Kubhekwe abagijimi beHollywood AC ukugcina isicoco sisekhaya

NGURUTENDO Nyahora okulindeleke ukuba abe ngomunye wabasubathi besifazane beHollywood AC ukwenza kangcono emjahweni wale kilabhu ngoMgqibelo.

Mzwamandla Zondi

KUBHEKWE abasubathi beHollywood Athletics Club (AC) ukuba bazibonakalise emjahweni wekilabhu yabo ozokuba ngoMgqibelo eWanderers Cricket Stadium, eGoli.

Le kilabhu inemijaho emibili njengoba owokuqala ubungeledlule eThekwini.
IHollywoodbets Joburg 10km ingenelwe ngabasubathi abawu-8 000.

Le mijaho yeHollywoodbets ingeminye yekhokha kakhulu eNingizimu Afrika njengoba izingqwele zizuza u-R37 500 ngokwahlukana kobulili.

Abasubathi bale kilabhu okubhekwe ukuba bavikele isithunzi sayo; nguStephen Mokoka, nguRutendo Nyahora, nguGerda Steyn oyingqwele yeTwo Oceans neComrades Marathon ngokwehlukana, ngamawele akwaJansen van Vuuren, uMelinda noMellissa, ukubala nje abambalwa.

NGUSTEPHEN Mokoka oyithemba leHollywood AC kwabesilisa.

ULala Cele weHollywood AC, uthe konke sekumi ngomumo.

"Sijabule ngesasasa elikhonjiswa ngabasubathi kulo mjaho wethu. Sekuvaliwe ukuwubhalisela lo mjaho waseGoli. Besilindele abasubathi abawu-8 000 esibathole emasontweni amabili edlule," esho.

Uthe abanye babasubathi babo bazokube bengekho kulo mjaho njengoba beyingxenye yeWorld Athletics Championships eqala ngoMgqibelo eJapan.

"Yize kunjalo, siyabethemba laba abakhona ukuthi bazokulwa ukuze isicoco sisale ekhaya. Uma sihambile, nalokho kuzobavula amehlo ukusebenza ngokuzikhandla ngonyaka ozayo," kusho uLala.

Izinombolo zalo mjaho ziqale ukulandwa  ngoLwesithathu kuze kube wuLwesihlanu.

* Abasubathi baKwaZulu-Natal bazokhiphana inkani emlenzeni wokuqala we-track & field ozokuba ngoMgqibelo eRichards Bay.

* Abomgwaqo bazogadulisana kwiMerebank 10km ezokuba ngeSonto, kusuka ngo-06h30 ekuseni khona belu eMerebank.
Ngolwazi kushayelwa uSarvash Padayachee kwethi: 084 207 9860.