OGQOKE isikhindi esimnyama ngu-XD Dlamini, olele phansi nguMdu Ntombela noBongani Mbatha abazobonakala emdlalweni weshashalazi  iBigly Yuge, ozokhonjiswa ePlayhouse, eThekwini, ngempelasonto.

Kuzoba buhlungu izisu kwabazobuka izidudla zomdlalo iBigly Yuge

Linda Ximba

KULINDELEKE ukuba bahleke baze baphathwe yizisu abazohambela umdlalo wasesiteji iBigly Yuge, elingiswa yizidudla ePlayhouse Drama Theatre, eThekwini, kusukela namhlanje ngoLwesihlanu usongwe ngoMgqibelo.

Lo mdlalo oqwashisa nokhuza isihlava esibi soku-cwaswa kwabantu abanomzimba owondlekile, okuvame ukuthi babekwe izici, futhi babizwe ngamagama angemahle ngenxa yendlela ababukeka ngayo, ukhuza ibuya njengoba wagcina ukubukwa ngaphambi kokuhlasela kweCovid-19, ngo 2020.

Ugabe ngabalingisi abaziwa emidlalweni kamabo-nakude, abazoshiya abaningi bebheme bakholwa ukuthi nasesiteji bayakwazi ukwenza into yamehlo. 

UBongani Mbatha, osebonakale emidlalweni eminingi njengoZalo ne-Amalanga Awafani, udlala indawo kaMambana, ophila nokukhubazeka. 

Uthe bahambele izikole ezifundeni ezahlukene, beyoxwayisa ngesihlava sokucwaswa kwabantu abakhuluphele.

Lo mdlalo uxwayisa , ukhuze isihlava sokucwaswa kwabondlekile ngomzimba

Omunye okhona nguMdu Ntombela, obelingisa uPhunyuka kwiMbewu:The Seed, udlala indawo kaFull Chicken, kanti uBhekani Shabalala, oseke wabonakala kuSibongile &The Dlaminis, udlala ekaQololomdlwane onguSihlalo weSiyabathutha Taxi Association.

Ubhekene nesimo esinzima njengoba kubhidlika umshado wakhe.

Kuzobonakala nomlingisi omusha, uMinenhle Sikhosana ongena endaweni kaBaby Cele. UMinenhle uyi-social influencer evamise ukubonakala kwiTik Tok naku-Instagram.

Uzodlala indawo kaCynthia ontshontsha inhliziyo ka-XD Dlaminini, odlala indawo kasomabhizinisi owushaya, u-Absalom, odiza ngemali ukuze azuze isipatsha sentokazi esinguCynthia, osebenza njengo-cashier e-supermarket.

Lo mdlalo uqondiswe wuqweqwe lomlingisi, uTony Kgoroge, ozakhele igama emidlalweni enjengoZero Tolerance neHotel Rwanda. Useke waqondisa imidlalo yasesiteji enohlo-nze njengeMooi Street Moves neWoza Albert.

Lo mdlalo uzokhonjiswa kabili namhlanje ngo-10 ekuseni nango-6:30 ntambama, bese uvalwa ngoMgqibelo ngo-6:30 ntambama.

Amathikithi aseqalile ukutholakala ngo-R150 isigaba ngasinye, eWebtickets nasePick n' Pay.