NGUTEBOHO Mokoena oyinjini yeDowns, okungaphusile ukumnika intuba yokukhahlelela ipali njengoba ekhombisile ededela udalimede wawuzwa ngendaba uThakasani Mbanjwa ezakhe ziguqisa iGolden Arrows ngo-2-1. Ukuphindile iDowns idla iSiwelele. Imbumbulu yeshodi lakhe ishaye ipali, ibhola laqathakela kuLetlhaku, walibeka enethini.

ISITHOMBE NGABE: BACKPAGEPIX

Senzo Sokhela
 
UMQEQESHI weMamelodi Sundowns, uMiguel Cardoso, udonse ngendlebe abadlali bale kilabhu ukufakela i-Orlando Pirates ingcindezi ephindiwe zisasuka nje amadaka ngombango wesicoco seBetway Premiership - ngokuthi balokhu beqhubekile nokuvula igebe esicongweni se-log.

IDowns izobhekana neChippa United koweBetway Premiership ngoMgqibelo ngo-17h30 eBuffalo City Stadium, e-East London.

Iya kulo mdlalo nje, inenebule iSiwelele FC ngo-3-0 koweligi ngoLwesithathu ebusuku eLoftus Stadium, ePitoli.

Amagoli ayo ashaywe nguKutlwano Letlhaku, uSiyanda Ndlovu noTashreeq Matthews.

NGU-MIGUEL Cardoso ongumqeqeshi weDowns, enomdlali wakhe, uMalibongwe Khoza.

ISITHOMBE NGABE: BACKPAGEPIX

UCardoso uxwayisa abadlali bakhe ngokuzibamba ziqine nakwiChippa, bangakunaki ukuthi isadonsa kanzima ukunqoba imidlalo selokhu kuqale le sizini.

"Umdlalo wethu neSiwelele ungijabulisile ngoba kasizange siwavuzise amagoli, okuwumkhuba obususijwayele.

"Okungazange kungiphathe kahle wukuthi siqale sayithatha kancane kanti izovele isibambe, saya ekhefini kungu-0-0, okuyinto ebesingayihlelile.

"Sisizwe wukuthi ikhathale ngesiwombe sesibili, sakwazi ukushaya amagoli. IChippa siya kuyona nje, sike saba nokuphazamiseka kulokhu kushintshwa inkundla esizodlalela kuyona.

"Kodwa-ke kakufanele nangengozi senze iphutha lokuyithatha kalula iChippa, ngoba ngiyibonile ukuthi idlala kahle futhi iyingozi.

"Inhloso yethu wukunqoba yonke imidlalo yethu yeligi esizoyigijima ngaphambi kokuqala imidlalo yeChampions League.

"Sifuna ukwenza isiqiniseko sokuthi siyawunqoba lo mdlalo ukuze sivule igebe lamaphuzu awu-9 esicongweni, okuzofakela ingcindezi izimbangi ezisilandelayo," kusho uCardoso.

* Isiyonke imidlalo yeBetway Premiership engempelasonto imi kanje:-
KUSASA NGOLWESIHLANU
E-Athlone: Stellenbosch FC vs Sekhukhune United 19h30.
NGOMGQIBELO
E-Old Peter Mokaba: Polokwane City vs Kaizer Chiefs 15h00.
EPrincess Magogo: AmaZulu FC vs Marumo Gallants 15h00.
EBuffalo City: Chippa United vs Mamelodi Sundowns 17h30.
NGESONTO
ESugar Ray Xulu: Milford FC vs Richards Bay 15h00.
EBloemfontein: Siwelele FC vs Golden Arrows 15h00.
ESolomon Mahlangu: TS Galaxy vs Kruger United 17h30.