NGENHLA; YiNkosi yamaNazaretha aseBuhleni, uMduduzi "Nyazilwezulu" Shembe, kanti ngezansi, yiSilo uMisuzulu kaZwelithini.

Nhlanhla Hudla

ICELE izibusiso kumholi wamaNazaretha ohlangothini lwaseBuhleni, iNkosi uMduduzi “Nyazilwezulu” Shembe, iNdlunkulu kaZulu, ngaphambi kwemikhosi emibili emikhulukazi yalesi sizwe.

Ngokuthola kweLANGA Lempelasonto, abantwana basendlunkulu ngokubambisana nomkhulumeli weNdlunkulu kaZulu, uMnu uMpikayise Buthelezi, yiNkosi uZuzifa kaMangosuthu Buthelezi nabanye abasondelene nendlunkulu, bahambele eBuhleni ngoLwesine ekuseni.

Imibiko iveza ukuthi bebeyocela umkhuleko nezibusiso ngaphambi koMkhosi woMhlanga, ongempelasonto, noMkhosi weLembe okulindeleke ukuba ube ngomhla ka-24 kwephezulu.

YINKOSI uZuzifa Buthelezi (ethwele umqhele phambili) okuvela ukuthi ibiyingxenye yethimba ebeliyocelela iNdlunkulu kaZulu izibusiso kuNyazi.

Umkhulumeli weNdlunkulu kaZulu utshele leli phephandaba ukuthi leli thimba likhishwe yiSilo uMisuzulu kaZwelithini, ukuyocela lezi zibusiso.

"Silapha nje, sithunywe yiNdlulamithi kaZulu ukuba sizobikela uNyazi ngale mikhosi esizokuba nayo. Esikucelayo wukuthi lusikhulekele (uNyazi), konke kuhambe kahle.

"Okunye esikuzele, wukuzokhuluma ngoMkhosi weLembe ozokuba kule nyanga. Ukuzobika lapha kuNyazi akukhona okokuqala, kwazise lusebenzisana kahle kakhulu noZulu," esho.

Kule mpelasonto kulindeleke ukuthi izinkulungwane zezintombi zinikele esigodlweni seSilo eMashobeni, ePhongolo, ziyoba yingxenye yoMkhosi woMhlanga.

Kungakapholi maseko, uZulu uzobuthana enkundleni yezemidlalo KwaDukuza, eMkhosini weLembe, iSilo uShaka kaSenzangakhona.