NGUNOZINTI weKaizer Chiefs uFiacre Ntwari (26) odabuka eRwanda, obelizwa ngendaba ijezi ngesizini edlule.

Zizoqala ikhempu eSpain, ziyiphethe eLesotho ukucijela isizini entsha

Mfanafuthi Ndlovu

ANGASE abolekiswe uFiacre Ntwari (26) waseRwanda ongunozinti weKaizer Chiefs ofike kubhekwe lukhulu kuyena esuka kwiTS Galaxy.

ILANGA Lempelasonto lithole ukuthi abaphathi beChiefs bazama ngazo zonke izindlela ukwebolekisa ngalo nozinti njengoba le kilabhu isanda kufaka emabhukwini ayo uRenaldo Leaner ophuma kwiSekhukhune United. Lo nozinti kulindeleke ukuba azoshubisa umbango wejezi kuBrandon Petersen okuthiwa seyivuselelwe inkontileka yakhe ebeyiphela, kanjalo noBruce Bvuma.

NGUNOZINTI uRenaldo Leaner osanda kujoyina iKaizer Chiefs esuka kwiSekhukhune United.

Omunye unozinti ojima nesikwati esikhulu seChiefs nguBontle Molefe ovimba eqenjini lale kilabhu eliyibamba kwiDStv Diski Challenge (DDC).
Kwenzeka konke lokhu nje, iChiefs izama ukusayinisa u-Ibrahim Bance obegijima kwiMarumo Gallants ngethemba lokuqinisa ngaye kumafolosi ale kilabhu njengoba kusekhona uGlody Lilepo no-Etiosa Ighodaro, ukukha nje phezulu.

Bekulindeleke ukuthi iChiefs ifulathele iNingizimu Afrika izolo ngoLwesine ukulibangisa eSpain ukuyoqala amalungiselelo esizini ezayo. Kubhekwe ukuthi ifike khona idlale neRangers yaseScotland emdlalweni ozokube uvalelekile kwabezindaba ongeSonto, iphinde igadulisane ne-Al Kholood yaseSaudi Arabia ngoLwesithathu ngaphambi kokushukana ne-Elche yaseSpain ngoMgqibelo ozayo.

IChiefs izobuya kuleli seyizobhekana neScottland FC yaseZimbabwe emqhudelwaneni weToyota Cup ozokuba ngeSonto lomhla ka-26 kuJuly eRoyal Bafokeng Sports Palace, eRustenburg.

Izosuka kulo mdlalo ilibangise eLesotho ukuvala amalungiselelo ngokudlala neLifofane FC ngeSonto lomhla ka-2 ku-August kuleliya lizwe.

KUZOMELE abhukule uBruce Bvuma ukuthola ijezi njengoba iKaizer Chiefs isisayinise uRenaldo Leaner okubhekwe ukuba ashubise umbango ezintini zale kilabhu.

*Imidlalo yokuzifudumeza yeChiefs ezoyigijima ngaphambi kokuqala kwesizini ka-2026/27 imi kanjena:
NGESONTO
EMarbella, eSpain: Chiefs vs Rangers.
NGOLWESITHATHU
EPinatar Arena: Chiefs vs Al Kholood 11h00.
NGOMGQIBELO MHLA KA-18
EPinatar Arena: Chiefs vs Elche CF 19h00.
NGESONTO MHLA KA-26
ERoyal Bafokeng Sports Palace: Chiefs vs Scottland FC 15h00 (Toyota Cup).
NGESONTO MHLA KA-2 KU-AUGUST
ELesotho: Chiefs vs Lifofane FC.