Usaziwayo akakholwanga ephuma kuqala kolweTV

NguTrevor Gumbi obe ngowokuqala ukukhishwa ohlelweni iThe Masked Singer.

Lucky Cain

KUMOSHEKE izifiso usomahlaya wodumo uTrevor Gumbi eba ngusaziwayo wokuqala ukuphuma ohlelweni lomculo lukamabonakude olusanda kukhuza ibuya, iThe Masked Singer olukhonjiswa kwiSABC 2.

Kulolu hlelo osaziwayo bacula kulona bezifihlile, kumele amajaji aqagele ukuthi yimuphi usaziwayo osuke ezifihlile.

Ngeledlule amajaji alolu hlelo okungu-J Something, uSithelo Shozi noSkhumba Hlophe ahluleke ancama ukuqagela igama likaGumbi njengoba kuze kwaba yijaji uSomizi Mhlongo omqagelayo, wakwazi ukuthola ukuthi yilo somahlaya.

  NguMpho Popps ongumethuli weThe Masked Singer emi noTrevor Gumbi engakavezwa ukuthi nguye obecula.

Ekhuluma neLANGA Lempelasonto ngokuphuma kwakhe kulolu hlelo, uthe akakholwa ukuthi ube ngowokuqala ukuphuma kulona, isifiso sakhe bekuwukulunqoba lolu hlelo njengoba kwenza uzakwabo uWarren Masemola ngesizini eyedlule.

 Uthe nakuba esheshe waphuma kodwa isipiliyoni asithole ngokuba ingxenye yalolu hlelo akasophinde asikhohlwe empilweni yakhe.

"Ngilijabulele kakhulu ithuba engilitholile, liyohlale lisenhliziyweni yami," esho.

Uthe ngaphambi kokuba abe yingxenye yalolu hlelo bekuduma upotiyane ukuthi mungakanani umsebenzi owenzeka ngemuva kulona.

 Uthe nakuba esheshe waphuma kodwa isipiliyoni asithole ngokuba ingxenye yalolu hlelo akasophinde asikhohlwe empilweni yakhe.

"Ngilijabulele kakhulu ithuba engilitholile, liyohlale lisenhliziyweni yami," esho.

Uthe ngaphambi kokuba abe yingxenye yalolu hlelo, bekuduma upotiyane ukuthi mungakanani umsebenzi owenzeka ngemuva kulona.

"Ngivuleke amehlo futhi angizisoli ngokuvuma ukungena kulona," kusho yena.

Utshele ILANGA Lempelasonto ukuthi kumumangazile ukuthi abantu aphila nabo futhi axhumana nabo nsukuzonke bahlulekile ukuqagela igama lakhe.

 "Kuyacaca ukuthi kuningi abangani bami uSkhumba noMpho Popps (umethuli walolu hlelo) abangakwazi ngomzimba wami ngoba ukuqagela kwabo kungishiye ngididekile," esho.

Uqhube wathi uma lingase liphinde livele elinye ithuba lokungena kulolu hlelo angavumela phezulu, ukuthandile ukuba ingxenye yalo.

UGumbi ungomunye wosaziwayo abazakhele igama emkhakheni wezokungcebeleka, ungumethuli wezinhlelo, umlingisi nosomahlaya.

Phakathi kwezinhlelo zikamabonakude aseke wabonakala kuzona kubalwa iFriends Like These, i-Ekhaya Backpackers, i-10 Over 10, i-Headline, umdlalo i-How To Ruin Christmas, i-Isitha, i-I love South Afrika nezinye.