I-NPA ichitha eyokungafuni ukusebenzisana nabaphenyi beDA

INHLANGANO eyengamele  ezokushushiswa kuleli, iNational Prosecuting Authorities (NPA), ichitha izinsolo zeDA, ezithi kayifuni ukusebenzisana nabaphenyi bayo abazimele, ecaleni lokusocongwa kowayenguSotswebhu we-DA kuMasipala waseMngeni, uMnu Nhlalayenza Ndlovu.

UNdlovu wadutshulwa wabulawa esemzini wakhe ngo-2023. Lezi zinsolo zivezwe yiMeya yaseMngeni, uMnu Chris Pappas, ngoLwesibili, ngemuva kokuhlehla kwecala lokubulawa kukaNdlovu eNkantolo yesiFunda saseMgungundlovu, lapho obekulindeleke ukuba abasolwa ababili balivume icala.

Laba basolwa nguMnu Khayelihle Shabalala nenkabi egwetshelwe inqwaba yamacala okubulala angahlangene naleli cala, uDeon Mathonsi.

Leli cala linabasolwa abane, okuyiNkosi yesizwe sakwaNxamalala, eMpendle, uSimphiwe Zuma, owayeyiNduna yesizwe sakwaNxama- lala, nosephenduke ufakazi wombuso uMnu Zwelithini Derric Buthelezi, uShabalala noMathonsi.

I-DA yakhipha umehlokaboni
ka-R1 million kongaba nomkhondo ngokubulawa kukaNdlovu.

Ngokuhamba kwesikhathi yaqasha abaphenyi abazimele, abasebenzisana nabaphenyi be-AfriForum ukuba bangenelele ekuphenyweni kwaleli cala.

NgoLwesibili, abameli bakaShabalala noMathonsi batshele inkantolo ukuthi abasolwa ngeke balivume icala ngenxa yezinkinga ezincane ezingakalungiswa.

Ngaphandle kwenkantolo, uPappas uveze ukuthi iNPA iyenqaba ukuthi basebenzisane.

Uthi abaphenyi babo banobufakazi obuqanda ikhanda obungaba wusizo ekuphothulweni kwaleli cala.

Iziphendulela ngoLwesithathu iNPA, ithi lokhu akulona iqiniso. Umkhulumeli wale nhlangano uNkk Natasha Ramkisson-Kara, uthi iNPA yaxhumana nabaphenyi.

"Sabazisa ukuthi bonke abathintekayo kuleli cala -  esingabala kubo abameli bakaMasipala waseMngeni,
yi-AfriForum, amalungu omndeni nabanye -  ukuthi lonke ulwazi abanalo mabaludlulisele ethimbeni labaphenyi abaphenya ngokusoco- ngwa kosopolitiki, iPKTT.

"Lokhu kungenxa yokuthi leli cala lingaphansi kwayo (iPKTT)," esho.

Kulindeleke ukuthi uShabalala noMathonsi babuyele kule nkantolo ngoLwesibili, beyovuma icala.