Kuzovundulula izimfihlo ukufika kwentandokazi yomlingisi kuZalo

Lucky Cain

KUZOVUNDULULA izimfihlo zakudala ukufika komlingisi omusha emdlalweni owuchungechunge Uzalo. UThulani Mtsweni, kulindeleke ukuthi aqale ukubonakala elingisa kulo mdlalo ngomhla ka-24 kwephezulu. Uzobe edlala indawo kaPondo.

Ngokwesitatimende esisithunyelelwe ngabakwa-SABC, lo mdlalo uqala isizini yesi-12 kulo nyaka, usaqhubeka nokubalwa neminye ehamba phambili kwiSABC 1 nakuba isibalo sawo siqhubeka nokwehla.

Kule nyanga lo mdlalo wethule abanye abalingisi asebeqalile ukubonakala, okubalwa kubo uNduduzo Zuma odlala indawo kaSmiso, uPhindile Mashabane odlala ekaLaDlamini, noSikhosiphi Ngcobo odlala ekaBab'Sizwe, ozoqala ukubonakala namhlanje ngoLwesihlanu kulo mdlalo.

Laba balingisi kulindeleke ukuthi ukufika kwabo kujike izinto kulo mdlalo, njengoba kubhekwe ukuthi uthathe elinye igxathu ukuzama ukukhuphula izibalo zababukeli.

Isikhulu esiphezulu kwaSABC 1, u-Ofentse Thinane sihalalisele laba balingisi ngokuba yingxenye yalo mdlalo.

"Siyababonga ngokungena kulo mndeni woZalo omqoka, sinethemba lokuthi ukufika kwabo kuzokwenza lo mdlalo ubenamandla, futhi uqhubeke nokuheha ababukeli," kusho uThinane.

Umdidiyeli walo mdlalo uDavid Mukwevho, uthe ukufika kwabalingisi abasha kuletha incazelo entsha ngawo.

Lo mdlalo uke wabhekana nezinkinga zokungabaholeli abalingisi nezisebenzi zawo,  kukhalwa ngezinkinga zemali zakwaSABC. Nakuba bagcina beholile, kodwa lokhu kwashiya imibuzo ngekusasa lalo mdlalo kumabonakude.
Izikhulu zeSABC zike zawunqumela ugwayi katiki ngokuthi kumele unyuse izibalo, njengoba zilokhu ziqhubeka nokwehla.

Lo mdlalo uqoshwa yinkampani iStained Glass TV, ephinde iqophe omunye umdlalo okhonjiswa kusona lesi siteshi obizwa ngokuthi Amalanga Awafani, nawo oke wabhekana nenkinga ezifanayo yokungaholelwa kwabalingisi nezisebenzi zawo.

Nawo lo mdlalo kuke kwavela imibiko ngokucikiza kwekusasa lawo kumabonakude, ngenxa yezibalo zababukeli ebeziphansi kunobekulindelekile.

Ethintwa uMtsweni ngokujoyina uZalo, ukuqinisekisile ukuthi usezozinza eThekwini, lapho lo mdlalo uqoshelwa khona. Akakwazanga ukuqhubeka nengxoxo njengoba ecele ukuba abuye athintwe njengoba ebematasa  nokuqopha lo mdlalo okhonjiswa phakathi nezinsuku.

UMtsweni uzakhele udumo emidlalweni eyahlukene kumabonakude, okubalwa kuyo iGomora, iHartklop, iNumber Number, iHush Money, iBlack Gold, Isibaya, Isidingo, Isono, Isiphetho, iLingashoni, iKowethu, iMabaso Family iReunion, iNikiwe, iRhythm City, iShaka iLembe neminye.