Iphethe ngodlame imibhikisho yabalwa nabokufika abakuleli ngokungemthetho

Thandoluhle Ngubo
 
IPHETHE ngodlame nokucekelwa phansi kwempahla imibhikisho yabebelwa nabokufika abebeqhingqe ngaphandle kwamahhovisi oMnyango wezaseKhaya, asezifundazweni ezehlukene zaseNingizimu Afrika, befuna ukuyobhalisela izimvume zokuba kuleli ngaphansi kohlelo lwababhaci (ababalekele izimpi emazweni abo).
 
Le mibhikisho ebiyenzeka eThekwini, KwaZulu-Natal, nasezingxenyeni zeGoli, iphethe ngokucekelwa phansi kwempahla yabokufika, okubalwa kuyo izitolo nezimoto, okuthiwa kwenziwe yizakhamizi zakuleli ebezidinwe zigane unwabu.

Le ntukuthelo iqubuke emuva kwesinqumo seNkantolo yoMthethosisekelo, esithi abokufika abangena eNingizimu Afrika ngokungemthetho, banelungelo lokuyobhalisela izimvume zokuba kuleli, emahhovisi akwandabazabantu.

Ngemuva kwalesi sinqumo, abokufika bavukele emahhovisi akwandabazabantu beyosebenzisa leli thuba. Kusuka ngoLwesithathu, izakhamizi zakuleli, amalungu enhlangano elwa nabakuleli ngokungemthetho, iMarch and March, namalungu amaqembu ahlukene ezombusazwe, baqale ukuhambela la mahhovisi, beyovimba ukuba abokufika bangakwazi ukubhalisela izimvume.

NgoLwesine, baqhubeke nawo lo mkhankaso, okuthe ngokuhamba kosuku, kwasuka isidumo njengoba le mikhankaso iphenduke yaba nodlame.

EThekwini, imibiko engaqinisekisiwe iveza ukuthi kube nokubambana ngezandla phakathi kwabokufika ngaphandle kwamahhovisi akwandabazabantu asemgwaqeni uChe Guevara (Moore Road).

Kuthiwa lokhu kuphethe ngokuthi kulimale owakuleli, okuyikho okucasule abebebhikisha, bashisa inkampani yamasondo ezimoto yabokufika eseduze.

Kakuphelelanga lapho, njengoba ababhikishi besuke lapho baqonda enkabeni yeTheku, okuyilapho okuthiwa bacekele khona phansi izitolo zabokufika, bashisa nezimoto zabo.

Kushone elayizolo izitolo zabokufika ezisenkabeni yeTheku zivaliwe, iningi lazo zibulawe amafasitela.

Imibiko yemithombo eyahlukene yabezindaba iveze ukuthi naseGoli kusuke isidumo, kwabanjwana ngezandla, kwaphoqa ukuthi amaphoyisa asebenzise izinhlamvu zenjoloba nesisi esikhalisa unyembezi ukuhlakaza ababhikishi.

ESoweto kushiswe izimoto, kwalinyazwa nempahla.

Okhulumela amaphoyisa KwaZulu-Natal, uCol Robert Netshiunda, uthe amaphoyisa aphumelele ukusheshe asilawule isimo, ngaphambi kokuba konakale kakhulu.