NGU-ARTHUR Zwane ongumqeqeshi woSuthu.

ISITHOMBE NGABE: BACKPAGEPIX

Mfanafuthi Ndlovu
 
KUPHOXEKE nomqeqeshi wamaZulu FC, u-Arthur "10111" Zwane abadlali bale kilabhu 'benqaba' ukuyodlala kwiCaf Confederation Cup ngesizini ezayo ngokuvumela iLamontville Golden Arrows yantshontsha iphuzu ngomzuzu wokugcina emdlalweni weBetway Premiership, ophele ngo-1-1 ngoLwesithathu ebusuku eMoses Mabhida Stadium, eThekwini.

Impi yoSuthu yokuqeda kwi-top 3 ukudlala kwiConfederation Cup ngesizini ezayo inyomfwe ngabadlali bale kilabhu, abayeke inqwaba yoqekelele bamathuba kulo mdlalo, obekuzokwenza le kilabhu ishiyane ngamaphuzu amabili neKaizer Chiefs esendaweni yesithathu.

Abaphathi boSuthu balibeka ngesihloko kusaqala isizini elokuthi kungabajabulisa ukuthi le kilabhu ibuyele emidlalweni yase-Afrika.

Igebe liqhubekile nokuba ngelamaphuzu awu-5 ekubeni sekusele imidlalo emithathu ukuba kugoqwe isizini.

ZIFISE sengathi belinomsila ibhola izitobha zoSuthu, zilibuka liyoqabula inethi.

ISITHOMBE NGABE: BACKPAGEPIX

Ekhuluma emuva kwalo mdlalo uZwane, uthe: "Sidedele amaphuzu singekho isidingo kwazise umdlalo bekungowethu, futhi ubusuphelile.

"Sibaphe iphuzu. Kufanele sizisole thina. Ngiphoxeke ngendlela eyisimanga." 

Uthe lo mphumela uphoxe nabo abadlali. Uthe inkinga ababhekene nayo wukungawasebenzisi ngendlela amathuba okushaya amagoli.

Uthe okumphatha kabuhlungu wukuthi emdlalweni odlule wasekhaya bebhekene neChippa United, bakwazile ukusebenzisa amathuba abawakhile, benqoba ngo-5-1 njengoba bewayekile kowe-Arrows.

Amagoli emdlalweni woSuthu ne-Arrows avalelwe enethini nguSandile Mthethwa elosokhaya, kwathi elaBafana Bes'thende leza noJerome Karelse seliyozilahla kunina.

Emdlalweni olandelayo, uSuthu luzobhekana ne-Orbit College ngoMgqibelo ngo-15h00 e-Olympia Park, kuthi ngomhla ka-16 lushukane neChiefs eMoses Mabhida Stadium. Azovala iligi ngokuvakashela omkhaya bawo, iDurban City eChatsworth mhla ka-23.

I-Arrows yona izobhekana nePolokwane City eKing Zwelithini Stadium eMlazi ngoMgqibelo, ivakashele iChippa United eNelson Mandela Bay Stadium mhla ka-16, ivale neTS Galaxy ekhaya mhla ka-23.