18 | Ezemidlalo
Friday, 08 May 2026
Izindaba ezibuhlungu ngesilomo seChiefs
UShabalala uphuthunyiswe esibhedlela kukubi elimala kubhekenwe neDowns
UGCINE ethole ikhadi elibomvu uJayden Adams weSundowns (ohleli phansi), emuva kokuthola amabili aphuzi.
ISITHOMBE NGABE: BACKPAGEPIX
Senzo Sokhela
KUVELA izindaba ezimbi ngomdlali weKaizer Chiefs, uMduduzi Shabalala (22), olimale ibambana neMamelodi Sundowns ngo-1-1 koweBetway Premiership ngoLwesithathu ebusuku eLoftus Stadium, ePitoli.
Igoli leChiefs lishaywe nguFlavio Da Silva, kwathi eleDowns labhajiswa ezintanjeni nguBrayan Leon.
UJayden Adams weDowns akawuqedanga lo mdlalo emuva kokuba ekhishwe ngekhadi elibomvu.
Lo mdlalo uphele sekumuncu uShabalala ekhishwa ngohlaka emuva kokuba ekhahlelwe nguyena u-Adams. Uphuthunyiswe esibhedlela kukubi njengoba kuvela ukuthi ugudluke ithambo ehlombe.
KUNGESIKHATHI uMduduzi Shabalala elinyazwa ngu-Adams weDowns.
ISITHOMBE NGABE: BACKPAGEPIX
UKhalil Ben Youssef ololonga iChiefs, ephawula ngemuva kwalo mdlalo, uthe: "Ngicabanga ukuthi kulo mdlalo sikhombisile ukuthi besifuna ukuzinqobela thina, hhayi omunye umuntu. Njengoba besishilo, sifuna ukuqeda isizini sisendaweni yesithathu.
"Okubuhlungu wukuthi silinyalelwe nguShabalala, okungenzeka ahlale inyanga kuya kwezimbili engabonakali ensimini. Kodwa-ke sizolwa kukhona konke lokho," kusho uBen Youssef.
IChiefs izobhekana neSekhukhune United koweBetway Premiership ngeSonto ngo-17h30 ePeter Mokaba Stadium, ePolokwane, kuthi ngomhla ka-16 igadulisane namaZulu FC eMoses Mabhida Stadium, eThekwini, ngaphambi kokusonga isizini ngokushukana neChippa United mhla ka-23 khona belu eMoses Mabhida Stadium.