NGU-ABDESLAM Ouaddou ongumqeqeshi wePirates, enika abadlali bakhe amaqhinga.

ISITHOMBE NGABE: BACKPAGEPIX

Senzo Sokhela
 
KWEXWAYISWA abadlali be-Orlando Pirates ukugwema ukubala amachwane inkukhu ingakachamuseli ngesicoco seBetway Premiership esibanga neMamelodi Sundowns, esembhidlangweni wokusinqoba amahlandla awu-9 kulandelana.

IPirates yenzelwe umusa yizimbangi zayo ezinkulu, iKaizer Chiefs, ibambana neSundowns ngo-1-1 koweligi ngoLwesithathu ebusuku eLoftus Stadium, ePretoria.

Lo mphumela wenze izinto zavuna iPirates ngesicoco seligi njengoba seyidinga ukunqoba imidlalo emithathu eyisalele ukuqukula lesi sicoco.

NGUSIFISO Luthuli ongumgadli wePirates obolekiswe kwiMagesi FC.

ISITHOMBE NGABE: BACKPAGEPIX

Izoqala ngokubhekana neMagesi FC - evika izembe - emdlalweni ozokuba ngoMgqibelo ngo-20h00 ePeter Mokaba Stadium, eLimpopo, ilandele ngeDurban City ngomhla ka-16 eSoweto, ivale nge-Orbit College mhla ka-23 eRustenburg.

Umqeqeshi weBucs u-Abdeslam Ouaddou, uthi yomithathu le midlalo izokuba nzima kwezakhe njengoba amanye amakilabhu evika izembe, amanye elwela ukuqeda kwi-top 8.

Uthi abadlali bakhe bangalinge bayithathe kalula iMagesi, ngoba lokho kungababeka engozini yokudedela lesi sicoco.

"Abantu babona sesiwunqobile lo mdlalo ekubeni singakafiki kwakufika kuwona, okuyinto engingayithandi futhi nabadlali bami bayakwazi lokho.

"Ngiyazi ukuthi kukhona ababona amaphuzu amathathu esesesikhwameni.

"Kuzofanele siyigade le nto ngoba ingasibeka engozini. Kufanele sikubeke eceleni ukuthi ihlulwe yi-Orbit College.

"Okufanele sikukhumbule wukuthi ike yehlula kabuhlungu iDurban City (5-2). Kodwa-ke nawo lo mdlalo uzofika siwulungele. Ngiyathemba ukuthi abadlali bami bazokulwela ukuwunqoba," kusho u-Ouaddou.

Isiyonke imidlalo yeBetway Premiership engempelasonto iqhathwe kanje:-
NGOLWESIHLANU
EChatsworth Stadium: Durban City vs Stellenbosch 19h30.
NGOMGQIBELO
EDr Petrus Molemela Stadium: Marumo Gallants vs Richards Bay 15h00.
E-Olympia Park: Orbit College vs AmaZulu 15h00.
EMbombela Stadium: TS Galaxy vs Chippa United 15h00.
EKing Zwelithini Stadium: Golden Arrows vs Polokwane City 17h30.
ELucas Moripe Stadium: Mamelodi Sundowns vs Siwelele 17h30.
EPeter Mokaba Stadium: Magesi vs Orlando Pirates 20h00.
NGESONTO
EPeter Mokaba Stadium: Sekhukhune United vs Kaizer Chiefs 17h30.