OwamaBhokobhoko ukhuthaze amajuniya amele elakuleli eMelika

NGU-RASSIE Erasmus ongumqeqeshi wamaBhokobhoko.

ISITHOMBE NGABE: BACKPAGEPIX

Mzwamandla Zondi

IYIVULE kahle iNingizimu Afrika imidlalo yeWorld Junior U/20 Championships eqhubekayo e-Oregon, e-United States of America (USA).

Ngosuku lokuqala (ngoLwesithathu), uJaco van Wyk owenza iShot Put, uhlomulele izwe indondo yethusi kulo mqhudelwano ephonsa ibanga eliwu-19.80, elandela uSi-hoon Park waseKorea owenze u-20.31, kanti ingqwele kube ngu-Alessandro Borgers waseBrazil, ophonse u-20.35.

Iqembu lakuleli le-4x400m elixubile, lenze kahle libeka irekhodi elisha lamajuniya kuleli banga, eseliwu-3:22:12, kwathi kowamanqamu langena unombolo 6, lenza kangcono isikhathi salo esidala libeka u-3:21:48 ngosuku olulodwa.

Leli qembu lakhiwe nguRyno Rikert, uZante van der Merwe, u-Abeline Schoeman no-Isabella Gunter.

Umgijimi wamabanga amade kwi-track, uNjabulo Hlatshwayo, uqophe isikhathi esiwu-14:13.90 kwi-5000m engena unombolo 16 kuleli banga.

Lo mqhudelwano uzosongwa ngeSonto.

UNJABULO Hlatshwayo (ongowesibili), ulale endaweni ka-16 kwi-5000m.

Iqembu lakuleli licishe langaya kulo mqhudelwano emuva kokuba i-Athletics South Africa (ASA) ithe abasubathi abazomela elakuleli kuwona kuzofanele bazihlanganisele imali yokuhamba ngoba yona kayinamali.

UMengameli we-ASA obambile, uJohn Mathane, uthi bazamile ukuhlanganisa imali yabasubathi abaya kulo mqhudelwano ngezinsuku zokugcina.

Abasubathi bakuleli abakulo mqhudelwano bathole izibusiso kuRassie Erasmus - ongumqeqeshi wamaBhokobhoko - obakhuthazile.

Uthe kufanele bazi ukuthi kuyisibusiso ukumela izwe labo. Uyalele abasubathi abakulo mqhudelwano ukuba balibambe ngazo zombili leli thuba.

U-Erasmus uyisilomo kuleli njengoba ehole AmaBhokobhoko enqoba iNdebe yoMhlaba ye-IRB amahlandla amabili kulandelana, njengoba leli qembu ladla ubhedu ngo-2019 eJapan nango-2023 eFrance ngokwehlukana.