AbeKhomishini kaMadlanga baphakamisa ukuba kushushiswe uSibiya, uNkosi noMogotsi

Ihhovisi likamengameli liveze lokhu, ngemuva kokucubungula umbiko wesikhashana wale khomishini...

 Okhulumela uRamaphosa uthi lezi ziphakamiso zizophenywa yithimba lamaphoyisa eliphenya amacala akhethekile...

 YiJaji uMbuyiseli Madlanga, elihola iMadlanga Commission.

Thandoluhle Ngubo

IKHOMISHINI kaMadlanga iphakamise ukuba kuvulelwe amacala obugebengu, kushushiswe iSekela loMkhuzi wamaPhoyisa kuzwelonke elisamisiwe, uJenene Shadrack Sibiya, iphoyisa elisamisiwe uSayitsheni uFannie Nkosi, ufakazi ofakaze kule khomishini, oyiphoyisa elingaphansi kwe-Crime Intelligence uWitness G, nosomabhizinisi waseNorth West, uBrown Mogotsi.

 YiiSekela loMkhuzi wamaPhoyisa kuzwelonke elisamisiwe, uJenene Shadrack Sibiya.

Lokhu kuvezwe yihhovisi likaMengameli wezwe uMnu Cyril Ramaphosa ngoLwesine, ngemuva kokucubungula umbiko owadluliswa ngumholi wale khomishini iJaji uMbuyiseli Madlanga, ngasekupheleni kukaMeyi nonyaka.

Ngokusho koMkhulumeli kaRamaphosa, uMnu Vincent Magwenya, uthi umengameli uyawemukela umbiko neziphakamiso eziveziwe.

"Umbiko ofike kumengameli ubuyekeza iziphakamiso nezincomo ikhomishini eyazenza embikweni wokuqala owethulwa ngoDisemba wonyaka ophelile, ikakhulukazi kule ngxenye ethinta ukuphenyisiswa kombutho wamaphoyisa.

"Lokhu kungenxa yokuthi sekunobufakazi obusha obuthinta iziphakamiso ezisembikweni wokuqala, njengoba ikhomishini iqhubeka nokuletha ofakazi, kodwa iningi lezi ncomo neziphakamiso kuncike ebufakazini osebethuliwe kusukela kuqale unyaka," esho.

 Iphoyisa elisamisiwe uSayitsheni uFannie Nkosi.

Eqhuba, uMagwenya uthi lo mbiko  uphakamisa ukuthi ihhovisi lika-Inspector-General of Intelligence nezinye izinhlaka eziphenyayo, ziqale uphenyo oluphuthumayo ngokusebenzisana nokuxhumana kweCrime Intelligence noWitness G noMogotsi.

Uthi lezi ziphakamiso zizophenywa yithimba lamaphoyisa eliphenya amacala akhethekile, elasungulwa ngemuva kokuba ikhomishini ikhiphe umbiko wayo wokuqala.

Khuzokhumbuleka ukuthi uSibiya wamiswa emsebenzini ngomhla ka-14 kuSephtemba wonyaka owedlule, ngezinsolo zokugxambukela nokuhlakaza uphiko lwamaphoyisa oluphenya ukusocongwa kosopolitiki KwaZulu-Natal, iPKTT.

Usomabhizinisi waseNorth West uBrown Mogotsi.

UNkosi, ongaphakathi ejele, wamiswa emsebenzini ngoMarch nonyaka, ngezinsolo zokweba, inkohlakalo, ukukhwabanisa, wukutholakala neziqhumane ezingekho emthethweni nokuzama ukuphazamisa ukusebenza kwengalo yomthetho. UMogotsi yena ungaphakathi ngamacala okuphazamisa ukusebenza kwengalo yomthetho, ukuqamba amanga efungile nokutholakala nesibhamu esingekho emthethweni. Imibiko iveza ukuthi uWitness G naye wamiswa emsebenzini ukuze aphenywe.