NGUMQEQESHI wePirates, u-Abdeslam Ouaddou.

ISITHOMBE NGABE: BACKPAGEPIX

Senzo Sokhela

UPHONSELE iPremier Soccer League (PSL) inselelo yokubhekisisa isimo sezinkundla okudlalelwa kuzona umqeqeshi we-Orlando Pirates, u-Abdeslam Ouaddou, ezakhe zinqoba umdlalo omqoka.

IBucs iqhubekile nokuhlala esicongweni se-log yeBetway Premiership emuva kokuba iguqise  iPolokwane City ngo-2-1 ngoLwesithathu ebusuku e-Old Peter Mokaba Stadium, ePolokwane.

Amagoli eBucs abhajiswe enethini nguRelebohile Mofokeng noPatrick Maswanganyi, kwathi elePolokwane lashaywa nguBonginkosi Dlamini.

"BEKUSIPHUKA izidindi" e-Old Peter Mokaba Stadium, u-Evidence Makgopa noRelebohile Mofokeng bePirates, begadulisa iPolokwane City ngoLwesithathu.

ISITHOMBE NGABE: BACKPAGEPIX

U-Ouaddou uzwakalise ukungenami ngokugijinywa kwalo mdlalo kule nkundla encanyana, ekubeni ikhona iNew Peter Mokaba Stadium ewumakhelwane wayo, esezingeni lomhlaba.

"Ngiyababongela abadlali bami, bekungelula neze, kunzima ukuhlula iPolokwane uma isekhaya.

"Iyiqembu eliqinile, isebenzisa isibindi uma idlala. Kodwa-ke isimo senkundla kasizange neze sisisebenzele.

"Kunenkundla eseqophelweni eliphezulu ewumakhelwane walena ebesidlala kuyona, kangazi kungani sidlaliswe kule ebheda ngalolu hlobo.

"Le nto ibulala isithunzi sayo iPSL, kufanele iyilungise. Kufanele icabangele abadlali, ibadlalise ezinkundleni ezisezingeni eliphezulu.

"I-PSL ingenye yamaligi amakhulu e-Afrika, sibaluleke kabi isithunzi sayo," kusho u-Ouaddou.