Abalandeli badinwe ngabaqeqeshi beChiefs

NGUMQEQESHI weKaizer Chiefs uCedric Kaze.

ISITHOMBE NGABE: BACKPAGEPIX

Senzo Sokhela

BADINWE bayaveva abalandeli beKaizer Chiefs njengoba belibeka ngesihloko elokuthi le kilabhu kufanele iphume umkhankaso wokuthungatha umqeqeshi, ngoba kufana nokuthi kakuhleli muntu ebhentshini layo.

IChiefs iphoxe izinkumbi zabalandeli bayo yehluleka zibekwa ukuvikela isicoco sayo seNedbank Cup iguqiswa yiStellenbosch FC ngo-2-1 koweLast 32 yalo mqhudelwano ngoLwesithathu ebusuku eDHL Cape Town Stadium. Amagoli eStellies avalelwe enethini ngu-Ibraheem Jabaar (obekuyiphenathi) noDevon Titus othumele inguzunga, kwathi eleChiefs kwaba yiphenathi eshaywe nguFlavio Silva.

BEKUQWIZA umentshisi kutholene phezulu uDevin Titus weStellies no-Aden McCarthy weChiefs koweNedbank Cup. Ongemuva nguThulani Mabaso weChiefs.

Abalandeli beChiefs bazwakalise ukungenami ngabaqeqeshi uCedric Kaze noKhalil Ben Youssef abanikwe lo msebenzi kuze kuphele isizini. Ezinkundleni zokuxhumana bakhala ngokushintshashintsha kwabo isikimu ngisho singekho isidingo.

Baqalise ebhentshini abadlali abanjengoZitha Kwinika, uLebohang Maboe noPule Mmodi ukukha nje phezulu, abasefomini kulezi zinsuku. Ephawula ngemuva kwalo mdlalo uKaze, uthe baphoxekile ngokwenzekile.

UPULE Mmodi uwuqale ebhentshini umdlalo wezakhe iChiefs neStellies.

"Basibambe ngemizuzu yokuqala. Sisuke sabavumela ukuthi bashaye amagoli ngokushesha, sisalele. Nathi siwatholile amathuba angoqekelele, sashaya nepali. Sibe neshwa kulo mdlalo, kufanele sikwamukele lokho, kunqabe yona inhlanhla. Kuzofanele sidlule kulokhu okwenzekile ngoba siya emdlalweni omqoka ngeSonto okufanele siwunqobe," esho.

IChiefs izobhekana ne-Al Masry yase-Egypt emdlalweni kaGroup D weCaf Condeferation Cup ngeSonto ngo-15h00 eFNB Stadium, eSoweto.

NGUMQEQESHI weStellenbosch FC uGavin Hunt.

UGavin Hunt ololonga iStellies, uthi kuzofanele bakhohlwe yilo mdlalo weChiefs kwazise kuza umdlalo ongase ucacise ngekusasa labo koweCaf Confed. IStellies izobhekana ne-Otoho d'Oyo yaseCongo kokaGroup C ngeSonto ngo-15h00 ekuhambeni.