NGULINDA Bhengu ongelinye lamathemba loMkhambathi FC.

Mfanafuthi Ndlovu

UMKHAMBATHI FC udlulele kuma-semi final eSafa ABC Motsepe League National Play-Offs azokuba ngoMgqibelo eMthatha, e-Eastern Cape.

Le kilabhu izobhekana neNorth-West University kwi-semi final yokuqala ezokuba ngo-11 ekuseni kuthi kweyesibili kudlale iHope FC yaseWestern Cape neNorthern Cape Professionals ngo-15h00.

Amakilabhu azonqoba imidlalo yama-semi final azongena esigabeni seMotsepe Foundation Championship (MFC).  Azogadulisana kowamanqamu wale midlalo, ozokuba ngeSonto ngo-15h00 ukukhipha izingqwele zikazwelonke, ezizohamba nomgqomo wenkomishi nesheke lika-R1 million.

Uma uMkhambathi ungathola igunya lokunyukela kwiMFC, kuzokube kuqala ngqa ukuthi iKwaZulu-Natal ikhiqizele lesi sigaba amakilabhu kumasizini amabili elandelana.

Kuzokhumbuleka ukuthi ngedlule kungene iMidlands Wanderers, esebenzisa iMpumalanga Stadium, eHammarsdale. NoMkhambathi uzosebenzisa le nkundla uma ungena kwiMFC.

Kubhekwa eyezinkundla ezifanayo nje, iMilford FC uma igcine yenyukela kwiBetway Premiership, izosebenzisa uMhlathuze Sports Complex njengenkundla yayo yasekhaya, okuyinto eyenziwa nayiRichards Bay FC edlala kulesi sigaba.

UMkhambathi ufinyelele kuma-semi final ngokuhlula iMpheni Home Defenders yaseLimpopo ngo-2-0, wabambana neProfessionals ngo-0-0 esigabeni samaqoqo, okwenze waqeda uqhwakele ku-group C, yize ubunamaphuzu alinganayo naweProfessionals edlulele phambili ngokulala isibili ngamaphuzu amaningi.