20 | Ezemidlalo
Friday, 05 June 2026
Siyazishwashwatha
IPirates idedelela iStellies uLebitso ukuthatha uMthiyane
NGUTHABISO Lebitso (kwesobunxele) ozophambana noMthetheleli Mthiyane, okhonjwa indlela ngunondweba, uMichael Mosemeng.
ISITHOMBE NGABE: BACKPAGEPIX
UZOPHAMBANA noThabiso Lebitso oyisitobha se-Orlando Pirates uMthetheleli Mthiyane olihlikihla esiswini kwiStellenbosch FC.
Umthombo waleli phephandaba ulipotshozele ukuthi sekuqedwe konke ngekusasa lalaba badlali njengoba eziMnyama zizokwengeza ngemali ngaphezulu, kwazise iStellies beyingazimisele ukwehlukana noMthiyane.
Lo mdlali uzobanga ijezi noThalente Mbatha benoMakhehleni Makhaula esiswini seBucs.
I-Arrows ezinhlelweni zokuvala isikhala sogaqelwe yiDowns neBucs
I-LAMONTVILLE Golden Arrows izama ukunxenxa uRonaldo Van Neel (okwesobunxele), obegijima kwiHungry Lions FC, edlala kwiMotsepe Foundation Championship (MFC) ukujoyina Abafana Bes'thende.
UVan Neel ufunelwa ukuyoqinisa le kilabhu njengoba ingase ilahlekelwe nguSiyanda Ndlovu (okwesokudla), ofunwa yiMamelodi Sundowns ne-Orlando Pirates.
'Bahleli ngesinqe' abadlali beChippa United
KUTHIWA abadlali abaningi bahleli ngesinqe esisodwa kwiChippa United njengoba umqeqeshi wayo omusha, uBrandon Truter efuna ukukhuculula.
IChilli Boys kuthiwa ihlela ukudedela uSomila "Ballo" Ntsundwana (osesithombeni) ongumgadli.
UNtsundwana ufike ethwelwe ngeqoma, esuka kwiRichards Bay FC, kanti no-Eva Nga kuthiwa angase adayiselwe ikilabhu yaphesheya kwezilwandle uma kungalungi, adayiselwe eyaseNingizimu Afrika kwazise umholo wakhe umba eqolo.
IBulls ifunga iyagomela ukuphendula amatafula eScotland
UKHOLWA wukuthi bazokwazi ukuqeda ukuchanasa kosokhaya uJohan Grobberlaar (othwele isigqoko esibomvu esithombeni), ongumdlali weBulls yasePretoria ezogadulisana neGlasgow Warriors yaseScotland kwiSemi final ye-URC ngoMgqibelo ngo-15h30 eScotland.
Ekhuluma ngaphambi kwalo mdlalo, ukubeke kwacaca ukuthi kabayile ukuyobukela ziwushaya kulo mdlalo.
"Siyazi ukuthi bayiqembu elidlala kahle kakhulu, futhi okungelula ukubhekana nalo, kodwa silindele umdlalo onzima kwazise basihlule kuyona yomibili imidlalo esiyidlale nabo.
"Senza amaphutha amaningi, okuyinto esizoyigwema kulo mdlalo," esho.
Omunye umdlalo uzokuba phakathi kweStormers yaseWestern Cape neLeinster yase-Ireland, eyizingqwele zalo mqhudelwano.