ISIKOLE i-Ezithabeni Secondary School, kwaNodunga, KwaMaphumulo, besilethelwe izinsiza.

Mthobisi Sithole

KUNGENELELE izinhlaka ezizimele ekutakuleni isikole okufundelwa kusona ngaphansi kwezimo ezinzima zengqalasizinda engekho esimweni esihle, okubalwa nokuvalelwa kwaso ugesi ngenxa yokukweleta.

Ngesonto eledlule i-KaMwandla Foundation, ilethele usizo isikole, Ezithabeni Secondary School, kwaNodunga, kwaMaphumulo.

Phakathi kwezinkinga ezikhungethe lesi sikole, kubalwa ukuguga kwesakhiwo (esibonakala esithombeni esingenhla), okuholele ekuvuzeni kukathayela, kawekho amawindi, i-ceiling board nokunye.

UNkz Thabile Mwandla, weKaMwandla Foundation, uthe ukuzwa ngezinkinga zakulesi sikole, kumenze wasondela eduzane.

Umkhankaso wakhe wokuhambela izikole zasemakhaya, uhlose ukugqugquzela abafundi ngokubaluleka kwemfundo, ukubalekelela uma befuna ukuthumela izicelo zokufunda ezikhungweni zemfundo ephakeme, nokunye.

NGUNKZ Thabile Mwandla, weKaMwandla Foundation, okhuthaze abanye osomabhizinisi ukulekelela isikole esiswele izinsiza.

"Umkhankaso siwuqale KwaNongoma sibambisene neTshatha Ngobe Foundation. Sisaqhubeka nokubeka phambili imfundo yabantwana basemakhaya, ngoba basilele emuva kokuningi," kusho uNkz Mwandla. 

Uthe lesi sikole sivalelwe ugesi ngoJanuary kuwona lo nyaka, namanje akusebenzeki kothisha ngenxa yalezi zinkinga.

Unxuse izitolo ezithengisa izinsiza zokwakha ukuba zelule isandla. Ziwu-4 izitolo ezinikele ngosimende, opende nothayela ukuze kuvuselelwe isikole.

Umcimbi uhanjelwe yizinyane leSilo esebuzile, uZibusiso kaZwelithini, iNkosi yesizwe uNkosikhona Zulu, uNkz Zandile Dlamini wakwaLegal Aid, uNkz Sinenhlanhla Mbambo ongummeli, abaseMfolozi College nabanye.

Umcimbi wokunikelela isikole, wesekwe
yi-Aquelle, yi-BB edayisa izinkwa, abempuphu iNyala, izitolo ezithengisa izimpahla zokwakha nabanye.

UNkz Thabile Mwandla ungomunye wososayensi abacwaninge ngomjovo wokuvikela isifo sengculaza kwabangakahaqeki.
mthobisis@ilanganews.co.za