Usuqalile umshikashika ngoweDurban July

Ngababekhangisa ngengqephu ngonyaka odlule kwiDurban July eGreyville Racecourse eThekwini.

Lucky Cain

SELIQALILE igidigidi lokulungiselela umcimbi wamahhashi nemfashini waminyaka yonke iHollywoodbets Durban July, ozoba seGreyville Racecourse, eThekwini ngomhla ka-4 kuJulayi kophezulu.

Lokhu kulandela ukukhishwa kohlu lwabaculi noDJ abazonandisa kulo mcimbi, okulindeleke ukuba udonse izinkumbi zabantu abaqhamuka ezinkalweni ezahlukene nezwe, nangaphandle.

Kulo nyaka esiteji esikhulu kuzobe kunandisa isihlabani sakuleli esike sahlabana ngendondo yeGrammy, uZakes Bantwini, ozobe eshiyelana inkundla nabanye okubalwa kubo iMi Casa, uWill Rayz, uWill Linley, u-Angel Mazibuko, uTamara Dey, iSupreme 3 ehlanganisa uLloy Cele, uLoyiso Bala noDanny K nabanye.

YiMicasa ezonandisa kwiDurban July ezoba seGreyville Racecourse, eThekwini ngomhla ka-4 kuJulayi kophezulu.

Kule mpelasonto ngoMgqibelo mhla ka-6 kuJuni kuzobe kunomcimbi ohambisana nokulungiselela lo mjaho wamahhashi nemfashini, obizwa ngeHollywoodbets Gold Challenge.

Kulo mcimbi kuzophinde kuhlungwe abasiki bengqephu abawu-25, kusale abawu-10 ngaphansi komncintiswano weYoung Designer Awards. Kulaba basiki bengqephu bazothola ithuba eliyingqayizivele lokukhangisa ngengqephu yabo emcimbini weHollywoodbets Durban July yalo nyaka ngaphansi kwengqikithi yalo nyaka, ebizwa ngokuthi Countru Allure.

Amathikithi okungena kulo mcimbi aseqalile ukutholakala, ajwayelekile ebiza u-R280, akhona nawezicukuthwane atholakala ngezindlela ezahlukene.

Khona manjalo namatende omntakabani kulo mcimbi nawo asekuvulile ukuthengiswa kwamathikithi ngamanani ahlukene. Elinye lamatende abe nedumela ngonyaka owedlule ngelibizwa ngokuthi Saso's Marquee Exeperience, elihlomule ngokuba yitende elivelele emcimbini wangonyaka owedlule.

Umnikazi waleli tende uSaso Ngcobo, uthe kulo nyaka bayalinyusa ngokuphindiwe izinga.

"Ukwesekwa esikutholile ngonyaka owedlule kusikhuthazile ukuthi nakulo nyaka siqhubeke, futhi silinyuse ngokuphindiwe izinga lethu," kusho uSaso oyilungu leqembu iDream Team.