02 | Izindaba
Friday, 05 June 2026
UMENGAMELI uCyril Ramaphosa uqinisa amaxhama obudlelwano neKenya
NGUMENGAMELI uCyril Ramaphosa nozakwabo waseKenya, uMnu William Ruto ezindlini zombuso, ePretoria.
UMENGAMELI uCyril Ramaphosa uhlangane nozakwabo waseKenya, uMnu William Ruto ezindlini zombuso (Union Buildings), ePretoria, ngoLwesihlanu, ngenhloso yokuqinisa amaxhama obudlelelwano, ikakhulukazi kwezohwebo nokuthuthukiswa kweminotho yala mazwe.
Kulindeleke ukuba ongqongqoshe beminyango eyahlukene yala mazwe, baqinise amaxhama obudlelwano, bese bakha namathuba okusebenzisana phakathi kwawo.
Luzokwethulwa ngokusemthethweni uhlelo lokusatshalaliswa kwemijovo
KULINDELEKE ukuba uMengameli uCyril Ramaphosa ethule ngokusemthethweni uhlelo lokusatshalaliswa kwemijovo yokugwema igciwane lesandulela-ngculaza ezinkundleni zemidlalo, iLilian Ngoyi, eMpumalanga namhlanje ngoLwesihlanu.
Le mijovo yohlobo lweLenacapavir, kubhekwe ukuba abazoyisebenzisa, bayisebenzise njalo ngemuva kwezinyanga eziyisithupha.
Le mijovo ewu-37 920, iqale ukufika kuleli
ngo-April nonyaka.
INingizimu Afrika ingelinye lamazwe ahamba phambili ngegciwane lesandulela-ngculaza (HIV) emhlabeni.
UMnyango wezeMpilo usemkhankasweni wokwehlisa isibalo sabahaqekile ngo-2030.
Kuboshwe amaphoyisa amathathu ngolwezidakamizwa ezazigcinwe emahhovisi oKlebe
KUBOSHWE amaphoyisa amathathu angosigaxamabande, asebenza oPhikweni loKlebe, KwaZulu-Natal, ngoLwesine ekuseni.
Lokhu kulandela izethulo ezenziwe ngamaphoyisa abhekene nokushushunjiswa kwezidakamizwa esifundazweni uKarl Sander, noGavin Jacob, abethula ubufakazi kwiKhomishini kaJudge Mbuyiseli Madlanga kusukela ngoMsombuluko.
Kuvele ukuthi izidakamizwa zohlobo lwe- cocaine, ezazigcinwe emahhovisini oKlebe, ePort Shepstone, ezingadayiswa ngo-R200 million, zebiwa.
UMogotsi ufuna ukuyiphonsela inselelo eyokunqatshelwa kwakhe ibheyili
UHLELA ukusiphonsela inselelo enkantolo enkulu isinqumo sokunqatshelwa kwakhe ibheyili, usomabhizinisi waseNorth West, uMnu Oupa Brown Mogotsi.
UMogotsi ubevele eNkantolo yeMantshi yaseGoli ngoLwesine, lapho enqatshelwe khona ibheyili ecaleni lokuqamba amanga ngokuthi kukhona abazame ukumbulala, elenzeka eVosloorus, ngoNovember wonyaka owedlule.
Ngesikhathi kulalelwe isicelo sakhe sebheyili kuleli cala, umbuso waphinde wengenza elinye icala lokuzama ukuphazamisa ukusebenza kwengalo yomthetho, njengoba umphenyi wecala aveza ukuthi uMogotsi wazama ukumfumbathisa imali ukuze ayeke ukuphenya icala.
Ikhipha isinqumo iMantshi uJohannes C Kruger, ithe uMogotsi angalibalekela leli cala, ngoba uhlulekile wukuhlinzeka inkantolo ngamakheli ezindawo azotholakala kuzo uma ededelwa.
Ummeli kaMogotsi uthi lesi sinqumo bazosiphonsela inselelo enkantolo enkulu.