Azoholwa yizethenjwa amaNazaretha eLesotho

KULINDELEKE ukuba abulale inyoka njengenhlalayenza amaNazaretha aseBuhleni, njengoba ezobe enenkonzo eLesotho.

Phumlani Gama

AZOHOLWA yithimba labefundisi abayizethenjwa zomholi webandla lamaNazaretha ohlangothi lwaseBuhleni, iNkosi uMduduzi "Nyazilwezulu" Shembe, amalungu aleli bandla azoba yingxenye yenkonzo eMaseru, eLesotho ngesonto elizayo.

 Kuzoqopheka umlando leli bandla lingenisa inkonzo enkulu okokuqala kuleliya lizwe. Izongena mhla ka-11, iphume ngosuku olulandelayo.

ILANGA Lempelasonto lithole ukuthi uNyazilwezulu luqoke abefundisi abayizethenjwa zalo ukuba bahole amalungu ebandla.

Ukuhlelwa kwale nkonzo kwenziwe emuva  kokuba kubonakale ukwenyuka kwesibalo sabantu abajoyina ibandla lamaNazaretha kuleliya lizwe.

YINKOSI yamaNazaretha engasekho, u-Amos "Nyangayezulu" Shembe.

Okhulumela leli bandla, uMnu Thokozani Mncwabe, uthe ukuhleleka kwale nkonzo, kuyingxenye yokufezeka kwephupho lomholi waleli bandla (ongasekho) iNkosi Amos "Nyangayezulu" Shembe, owakhipha isiphrofetho sokuthi leli bandla lizokhula lisabalale nakwamanye amazwe.

"Singamalungu ebandla, siyabuza nje ukuthi kungani lokhu kwenzeke ngesikhathi lapho kuyizinsuku zesikhumbuzo seNkosi AK Shembe.

"UNyazi luqoke abefundisi ukuba bahambise inkonzo ezothatha izinsuku ezimbili, emuva kwalokho bazobuya bezokwethula umbiko. Kuzobe sekuhlelwa ukuthi kungene yena umholi wethu uNyazi ayophothula umsebenzi.

"Akhona amathempeli amaNazaretha eLesotho, kodwa kungokokuqala ukuthi kube nenkonzo enkulu. Kunabantu abakhulu bakuleliya lizwe abaphendukele kuShembe.

"Sizofika kuleliya lizwe sihlangane nabo, ukuze kuzokwenziwa izinhlelo ezinkulu, okuhlanganisa nokubusiswa kwendawo.

"Abefundisi abajutshiwe bazofika bakhulekele nezinkinga ezikhungethe uhulumeni, nabantu bakuleliya lizwe," kusho uMncwabe.