Kuchazeke nomqeqeshi wePirates kungena uMoremi kwiBafana

NGUMQEQESHI wePirates, u-Abdeslam Ouaddou.

ISITHOMBE NGABE: BACKPAGEPIX

Mzwamandla Zondi

UMQEQESHI we-Orlando Pirates u-Abdeslam Ouaddou, uzwakalise injabulo ngokuqokelwa kwiBafana Bafana komdlali osanda kujoyina le kilabhu, uTshepang Moremi.

Lo mdlali ufakwe okokuqala esikwatini seBafana esigijima imidlalo yokuhlungela ukuya kwiNdebe yoMhlaba yeFifa ezokuba ngonyaka ozayo eCanada, eMexico nase-United States of America (USA).

Le midlalo isiyasongwa njengoba sekusele emibili iBafana ezoyidlala neZimbabwe neRwanda ngokwehlukana ngelizayo.

NGUTSHEPANG Moremi wePirates egadulisa abadlali beTS Galaxy emdlalweni weligi ophele ngo-2-0, kunqoba iPirates.

ISITHOMBE NGABE: BACKPAGEPIX

Lo mqeqeshi ukusho lokho esigcawini sabezindaba kukhulunywa ngomdlalo wabo weCarling Knockout abazowugijima neSiwelele FC ngoMgqibelo ngo-15h00 e-Orlando Stadium, eSoweto.

Isikwati seBafana simenyezelwe ngoLwesine emini. IBafana iya kule midlalo nje, isanda kwephucwa amaphuzu amathathu ngenxa yokudlalisa uTeboho Mokoena kubhekenwe neLesotho, ekubeni wayesenamakhadi amabili aphuzi.

U-Ouaddou uthi ujabule ngokuqokelwa kukaMoremi eqenjini lesizwe. Uthi okubasizayo wukuthi basebenza ngokubambisana nabadlali, okwenza kube nzima kuyena ukuqoka abadlali abasuke bezoqala imidlalo.

"Lo mdlalo esiya kuwona ngoMgqibelo ubaluleke kabi. ISiwelele yikilabhu engingeke ngiyithathe kancane, kodwa sizokulwa ngayo yonke indlela ukuqinisekisa ukuthi sidlulela esigabeni esilandelayo salo mqhudelwano. Okubalulekile wukujabulisa abalandeli bethu ngokuba siwunqobe.

"Siya kulo mdlalo nje, bonke abadlali bami baphile saka, kanti nalabo esibe nabo engozini yemoto sebeqalile ukuzihlanganisa nekilabhu," kusho u-Ouaddou.

NGULEHLOHONOLO Seema ocija iSiwelele.

ISITHOMBE NGABE: BACKPAGEPIX

ULehlohonolo Seema opheka iSiwelele, uthi bayazi ukuthi baya kwiPirates efana nomshini ogayayo njengoba isinqobe imidlalo eyisihlanu ilandelana.

Uthi ngeke bakufake emakhanda ukuthi le ndebe ijwayele ukunqotshwa ngamakilabhu amancane, okubalulekile wukudlulela phambili.

"Kunzima ukudlala nePirates ngoba inabadlali abaningi abasezingeni eliphezulu. Inzima yonke indawo, kulukhuni ukuyihlelela, inabadlali abasebancane futhi abanesivinini ngendlela eyisimanga. Kodwa-ke sizokulwa kulo mdlalo," kusho uSeema.

Uthi okubalulekile wukunqoba imidlalo yeligi ngoba izinto kazibahambeli kahle kwiBetway Premiership. Uphethe ngokuthi balibheke ngabomvu ikhefu leFifa ukulungiselela kahle imidlalo yeligi.

Omunye umdlalo obhekiwe ngempelasonto ngoweLamontville Golden Arrows neSekhukhune United, ozokuba ngoMgqibelo ngo-18h00 eKing Zwelithini Stadium, eMlazi.

Umqeqeshi weSekhukhune, u-Eric Tinkler, uthi ngeke bakuvumele ukwehlulwa kabili kulandelana njengoba ngeledlule beguqiswe okokuqala emidlalweni yeligi, bebuyiselwa kwamhlaba ngomkhaya babo, iPolokwane City, ebashaye ngo-1-0, okwenze behla esicongweni se-log.