21. Kudideke nabaqeqeshi bamaBhokobhoko ngoMngomezulu

Sazi Mkhwanazi

AMEHLO abathandi bombhoxo eNingizimu Afrika azokube ethe njo kumdlali osemncane wamaBhokobhoko, uSacha Feinberg-Mngomezulu (23), odide ithimba labaqoki beqembu elizobhekana ne-Argentina kowokugcina weCastle Lager Rugby Championship ngoMgqibelo ngo-15h00 eTwickenham, e-England.

Lo mqhudelwano udlalwa yi-Argentina, yi-Australia, yiNew Zealand neNingizimu Afrika.

UMngomezulu udlale ingcwenga yombhoxo ngesikhathi la mazwe ebhekene emlenzeni wokuqala obuseThekwini ngoMgqibelo odlule.

Ucamelise ama-try awu-3 - kwawu-9 atholwe ngamaBhokobhoko - wephula irekhodi likaPercy Montgomery lokuhlohla amaphuzu amaningi emdlalweni owodwa wamaBhokobhoko.

Uhlohle awu-37, kanti uMontgomery yena wathatha umhlalaphansi ngo-2009 ehlohle awu-35, awathola elakuleli lidlala neNamibia ngo-2007.

Bacishe balingeka bashiya isithandwa samaBhokobhoko

Umqeqeshi wamaBhokobhoko uRassie Erasmus, uthi bacishe balingeka babiza uHandre Pollard ukuqala umdlalo, nokho babuye bawushintsha lowo mqondo.

Abahlaziyi bombhoxo bathi yize bekuzokhalisa abaningi ukuqalisa uPollard - kwazise uMngomezulu uvutha engabaselwe - kodwa lezo zikhalo bezizosheshe ziphele ngoba isipiliyoni sikaPollard siyadingeka kulo mdlalo kwazise ubalulekile.

Ekhuluma ngoMngomezulu u-Erasmus, uthe: "Sisazama ukumakha, ngenhlanhla-ke, akazikhwahleli futhi akagiyi ngezimanga azigila enkundleni, ukuba bekunjalo, ngabe akasekho kulesi sikwati. Iqiniso nje wukuthi singabaqeqeshi, sike saba nomcabango wokuqoka uPollard (endaweni kaMngomezulu), kodwa-ke sabona ukuthi (uMngomezulu) uzofunda lukhulu kulo mdlalo."

Kabanendaba nokuthi uzoshaya udaka kumbe usazogila izimanga kulo mdlalo.

"Simfaka emphandlwini wezingonyama ukuze ajwayele ukumelana nengcindezi. Ukuthi ushaye udaka noma ugile izimanga kulo mdlalo, kasinandaba, kodwa esineqiniso lakho wukuthi lukhulu azolufunda kuwona."

Uncome lo mdlali ngokuzithoba.

Kanti uzakwabo kumaBhokobhoko, uDamian de Allende - osenqobe iNdebe yoMhlaba ye-IRB naleli qembu amahlandla amabili (2019 no-2023) - uthe uMngomezulu nguyena ozobanqobela i-Argentina, yinqobo nje uma bona bemelekelela ngendlela efanele.

Uchaze uMngomezulu njengomdlali obukhali, njengoba ethi yize ake amcathulise - amkhombise izikhala lapho okufanele aphase khona noma adlule khona - "kodwa kwesinye isikhathi nguyena obona isikhala kuqala, thina singakasiboni".

Uma amaBhokobhoko enqoba kwi-Argentina, azoqukula isicoco salo mqhudelwano okwesibili amahlandla elandelana, okuzobe kungokokuqala kwenzeka.

Nokho leli qembu selivele lisebenzela phezu komlando elawuqopha ngo-2023, livikela indebe yomhlaba (Webb Ellis) elalikade liyiqukule ngo-2019.

Lowo mlando wawuhambisana nowokuthi AmaBhokobhoko abe yiqembu lokuqala ukuqukula iWebb Ellis amahlandla amane.

* Komunye umdlalo weCastle Rugby Championship, i-Australia izogadulisana neZew Zealand ngo-11h45.

Kuzo ezombhoxo, iHollywoodbets Sharks yenze izinguquko eqenjini layo elizobhekana neDragons yase-Italy kowesibili we-United Rugby Championship (URC) ngoLwesihlanu ngo-21h05 ekuhambeni.

Leli qembu laseThekwini liwuvule kabi lo mqhudelwano liguqiswa yiGlasgow Warriors yaseScotland ngo-35-19 ngeledlule.

Umqeqeshi weSharks, uJohn Plumtree, uphoqeleke ukuqoka u-Edwill van der Merwe kunombolo 15 ngenxa yokulimala kukaYaw Penxe, kanti no-Aphelele Fassi ovame ukudlala le ndawo usephinde walimala, njengoba eke wahlala isikhathi eside ngesizini edlule ngenxa yakho ukulimala.

ULukhanyo AM obedlala unombolo 13 ngeledlule uzogijima ku-12, kuthi uJurenzo Julius obesebhentshini, aqale kunombolo 13.

Kudideke nabaqeqeshi bamaBhokobhoko ngoMngomezulu

U-Erasmus uchaza ngokwenze banquma ukumfaka emphandlwini wezingonyama

Yenze izinguquko ezimbalwa iSharks kowe-URC