Bankankanya eyokubuyisa owafaka ehlathini iCape Town City

NGU-ANDRIES Ulderink okuvela ukuthi izikhulu zeCape Town City zicabanga ukumbuyisa ukuyololonga le kilabhu.

ISITHOMBE NGABE: BACKPAGEPIX

Mfanafuthi Ndlovu

ZINKANKANYA ukubuyisa umqeqeshi owazishiya otakwini izikhulu zeCape Town City elokhu iqhubekile nokushaya udaka kwiMotsepe Foundation Championship (MFC).

Le kilabhu iphinde yaphoxa abathandi bayo idliwa ngomakoti beMFC, iLeicesterford City ngo-1-0 koweligi ngoLwesithathu isekhaya, okwenze izikhulu zaqala ukucabanga ukubuyisa u-Andries Ulderink (56) waseNetherlands kwazise zikholwa wukuthi angazikhipha osizini ezibhekene nalo.

Lo mqeqeshi nguyena obehola le kilabhu idliwa yizembe esigabeni esikhulu ngesizini edlule, kanti ubekhona enkundleni emdlalweni neLeicesterford.

Nokho kuthiwa kakuyena yedwa okumunyungwa igama lakhe kule kilabhu njengoba kubalwa noBrandon Truter osanda kuhlukana ne-Upington City, kanjalo noShaun Bartlett ogcine ukusebenza kwiCape Town Spurs ayenyusela esigabeni esikhulu maqede yamxosha emuva kwemidlalo embalwa.

NGU-KEAGAN Dolly weCape Town City exinwe nguPhathutshedzo Nange weLeicesterford City.

ISITHOMBE NGABE: BACKPAGEPIX

Imizamo yokuthola uJohn Comitis oyisikhulu seCape Town City iphunzile kwazise ucingo lwakhe belungena, kodwa lungabanjwa.

* Kwenzeka lokhu nje, iMilford FC izokuya ngaphandle kukaMenzi "Deco" Chili osalimele emdlalweni neBaroka FC weMFC ngoMgqibelo ngo-15h30 eGlobal Village, eLimpopo.

UDan Malesela opheka iBaroka FC, utshele ILANGA Lempelasonto ukuthi kuzokuba wumdlalo onzima ngoba neMilford FC zisayihambela kahle izinto.

* U-Abram Mangoye opheka i-Upington City ufunwa yiPhiladelphia Union yase-United States of America ecijwa nguBradley Carnell.

Isiyonke imidlalo yeMFC engempelasonto ihlelwe kanje:-
NGOMGQIBELO
E-Absa Tuks Stadium: University of Pretoria vs Casric Stars 15h30.
EGlobal Village: Baroka FC vs Milford FC 15h30.
EThohoyandou: Black Leopards vs Highbury FC 15h30.
EMxolisi Dicky Stadium: Hungry Lions vs Kruger United 15h30.
KaNyamazane Stadium: The Bees vs Upington City 15h30.
NGESONTO
EHarry Gwala Stadium: Midlands Wanderers vs Gomora United 15h30.
E-Olympia Park: Lerumo Lions vs Venda FC 15h30.