Isifo sokudlikiza singaba yingozi uma singasukunyelwa

U-70%  wabanalesi sifo uyelapheka ngemishanguzo etholakala kodokotela namakhemisi ...

ISIFO sokudlikiza (ama-fits), yize selapheka, kodwa singaba yingozi uma umuntu ovama ukuhlaselwa yiso esiziba, engasheshi ukuthola usizo lwezempilo.

Lesi sifo sidalwa wukuphazamiseka kwemithambo exhumanisa umzimba nengqondo. Lokhu kuholela ekutheni umuntu abenesiyezi, umqondo uhluleke ukusebenza, agcine ngokuwa.

Uma umuntu esehlaselwe yilesi sifo, uyadlikiza, ngoba kusuke kunokuphazamiseka kokusebenza kwemithambo yegazi, nezicubu zomzimba. Lokhu kudlikiza, kungathatha imizuzu ewu-10 nangaphezulu, futhi kungaba yingozi ngoba kuya ngokuthi uma umuntu ewa, uwela endaweni enjani.

Umuntu esimhlasele lesi sifo angawela emlilweni, esizibeni, noma kwi-swimming pool, agwilize, lokhu kungambeka kwenkulu ingozi.
Uma umuntu esehlaselwe yilesi sifo, umzimba uyaqina, aqale adlikize, abanye baze bazichamele, bengahlosile.

Uma kwenzeka konke lokhu, umqondo usuke ungasebenzi, nomuntu engazi nokuthi ukuphi, futhi kwenzekani lapho ekhona.

Ongoti bathi ukudlikiza kudalwa wukwenyuka okukhulu komfutho wegazi, futhi lesi sifo sivama ukuhlasela abantu abaphuza utshwala ngokweqile, nabasebenzisa izidakamizwa.

Odokotela bathi isifo sokudlikiza siyelapheka uma sishesha ukusukunyelwa, njengoba u-70% wabantu abanalesi sifo, belashwa ngemithi etholakala emakhemisi nakodokotela. Nabelaphi bendabuko bayakwazi ukuselapha lesi sifo, ngamakhambi esintu.

Uma kunomuntu osehlaselwe ukudlikiza, kuthiwa ungamnika usizo lokuqala (first aid), ngokuthi umlalise abheke phezulu, umbambe ikhanda, bese ufaka indwangu emlonyeni, ukuze angazilumi ulimi ngesikhathi esadlikiza.

#Ulwazi siluthole kwi-Epilepsy Foundation
menzi.jele@ilanganews.co.za