NGUMENGAMELI weSafa, uDanny Jordaan (okwesobunxele) enomqeqeshi weBafana Bafana, uHugo Broos.

ISITHOMBE NGABE: BACKPAGEPIX

Mfanafuthi Ndlovu

UMENGAMELI weSouth African Football Association (Safa), uDanny Jordaan,  uveze ukuthi uzokuba nomhlangano oyinguyazana nomqeqeshi weBafana Bafana, uHugo Broos, owathi uzozibeka phansi izintambo ngemuva kwemidlalo yeNdebe yoMhlaba yeFifa eqhubeka eCanada, eMexico nase-United States of America (USA).

IBafana itheleke ngoLwesine ekuseni eNingizimu Afrika emuva kokuwashiswa ijezi yiCanada, eyehlule ngo-1-0 emdlalweni we-last 32 yalo mqhudelwano ngeSonto ebusuku e-USA.

Ibihlangatshezwa ngabalandeli esikhumulweni sezindiza i-OR Tambo International eGoli.

UJordaan ekhuluma nabezindaba esigcawini ebesenzelwe kusona lesi sikhumulo, uqale wancoma iBafana ngokudlala ngokuzimisela kulo mqhudelwano ebeyiqala ukufinyelela esigabeni somkhumulajezi kuwona.

Uthe ngabe akabenzi ubulungiswa uma engababongi abadlali ngokudlala ngokuzimisela kule midlalo.

"Ngizokuba nomhlangano omqoka noBroos ngasese, sibhunge (ngekusasa lakhe). Ngifuna ukuzwa nemizwa yakhe njengoba sesibuya kwindebe yomhlaba.

"Phela sesifana nomndeni kwiSafa, konke kufanele sikwenze ngokuvumelana ukuze sifinyelele kahle esiphethweni," esho.

NGURELEBOHILE Mofokeng.

ISITHOMBE NGABE: BACKPAGEPIX

Okuqaphelekile kulesi sigcawu sabezindaba, wukuthi u-Oswin Appollis ogijima kwi-Orlando Pirates noLyle Foster bebengabonwa nangokhalo kwazise bacele kwiSafa ukuthatha amaholidi ngokwahlukana.

URelebohile Mofokeng naye ubengekho njengoba eseBelgium ukuyohlolwa ngodokotela beRoyale Union Saint -Gilloise ukuthi ukulungele yini ngokwesimo sempilo ukudlala kule kilabhu egijima esigabeni esikhulu sakuleliya lizwe.

Le kilabhu isivumelene ngakho konke nePirates, besekubambe lokhu kuhlolwa nokuthi le kilabhu iqede konke noMofokeng ngalokho akufunayo.

Kuthiwa uzohola u-R1,7 million ngenyanga.