Seliphinde lagcwala umoya ibhantshi kuMntwana uThulani

 UMntwana uThulani uthi uthuke woma, efonelwa yizintatheli...

 NguMntwana uThulani okuvela ukuthi iSilo simkhombe indlela.

SEKUVELE izindaba zokuthi iSilo uMisuzulu kaZwelithini, sesikhombe indlela uMntwana uThulani kaGqikazi Zulu, waseZibindini, obengumkhulumeli weNdlunkulu kaZulu.

Kuthiwa iMbube ixoshe uMntwana uThulani ngoMsombuluko, ntambama, ngemuva komcimbi wokugcina isiko lamakhosi, wokuThela aManzi.

Kuvela ukuthi uMntwana uThulani utshelwe emehlweni yiSilo, ukuthi akasadingeki eNdlunkulu kaZulu, futhi angaphinde azihlanganise nezindaba zakhona.

Umthombo ongaphakathi eNdlunkulu, obukhona kuxoshwa uMntwana uThulani, uthi bekushubile, njengoba lokhu kwenzeke kukhona zonke izinsika zaseNdlunkulu.

YiSilo uMisuzulu okuthiwa sichithe uMntwana uThulani emuva kokusabalala kwenkulumo ezinkundleni zokuxhumana.

"UMntwana uThulani uxoshwe phambi kukaMfundisi uThulasizwe Buthelezi, onguNdunankulu kaZulu, uMntwana uNathi waKwaMandlakazi, okunguyena omele iSilo esiShayamthetho, noMntwana omdala waseNdlunkulu, uMntwana uPhilemon kaTshelendoda, waKwaFihlingqindi.

"Lokhu okusabalele ezinkundleni zokuxhumana kuyiqiniso, noma uMntwana uThulani ethi usekhona eNdlunkulu, lokho akulona iqiniso, uxoshiwe," kusho umthombo.

ISilo kuthiwa sicasulwe yinkulumo eqoshiwe lapho uMntwana uThulani, ekhwela edilika kuMnu Arnold Nododile Ndamase, onguMqondisi weziNdaba eHhovisi leSilo, emsola ngokuhlela nokuhamba neSilo beya eMahlamba Ndlopfu, ePitoli ngempelasonto, lapho behlangane khona noMengameli uCyril Ramaphosa.

Kulowo mhlangano kuthiwa kubhungwe ngemibhikisho ebikhona, ebibhekiswe kwabokufika abaseNingizimu Afrika ngokungemthetho.

UMntwana uThulani uzwakala ekhuluma amazwi aqinile, abhekiswe kuNdamase, emsola ngokuhamba neSilo bengekho bona njengeNdlunkulu kaZulu.

ILANGA Lempelasonto lithinte uMntwana uThulani, othe yena unegazi laseNdlunkulu, ungowegazi leSilo uSolomon, akekho ongamkhipha "kwabo".

"Ngithuke ngacishe ngashayeka phansi ngibuzwa yintatheli yeNewzroom Afrika, ukuthi njengoba iSilo siseMahlamba Ndlopfu nje, sikhuluma ini nomengameli. Ngikwazile ukwenza leyo interview, noma bengixinwa ngemibuzo ebengingayilindele.

"Yilapho-ke engithole khona ukuthi iMbube, isithathwe yayobonana nomengameli. Umyalezo oqoshiwe osabalele, bengikhuluma khona noNdamase. Ngakhuluma naye ngiphatheke kabi ngoba imigudu yokukhipha iSilo kayilandelwanga.

"Uma lowo muntu esethatha into engangiyixoxe naye, eseyisabalalisa, okwakhe lokho. Mina ngangizwakalisa kuye ukungaphatheki kahle kwami," esho.

Akukhona okokuqala iSilo uMisuzulu, simkhomba indlela uMntwana waseZibindini; waxoshwa eminyakeni emibili eyedlule, wabuyiswa  njengoba esephinde exoshwa nje.
menzi.jele@ilanganews.co.za