Indumiso eThekwini ekhonsathini yowenoni, iWay Maker

USinach uthi iNingizimu Afrika ifana nekhaya kuye, njengoba enye yezingoma zakhe eyiqophe kuleli...

Ngumculi we-gospel uSinach othi, ulethe indumiso eThekwini.

 Thandi Zondi

BAZOQHUBEKA nendumiso yePhasika abathandi bomculo we-gospel, njengoba isilomo sowokholo, uSinach sizohambela eThekwini.

Le ntokazi yaziwa ngezingoma ezingaconsi phansi kubathandi bomculo we-gospel, okubalwa kuzo esihloko sithi, Way Maker, I Know Who I Am nethi, The Name of Jesus.

Lo mcimbi obhekwe ngabomvu uzoba mhla ka-13 Ephreli, eWestridge Tennis Stadium, ngehora lesi 19:00.

 Lo mculi uthi ukujabulele ukukhuza ibuya eNingizimu Afrika. Uthi leli lizwe lifana nekhaya kuye njengoba ezinye zezingoma zakhe ezithakaselwayo eziqophe khona.

"Ngizobe ngivakashela okokuqala ngqa eThekwini, ngilangazelele indumiso enkulu esizoba nayo. Ubukhona bukaNkulunkulu, nokugcwaliseka kwamandla omoya oyingcwele.

"Sizobe sisebukhoneni bukaNkulunkulu uqobo. Kuzobe kungesiwo umcimbi nje kuphela, kodwa wukuhlangana kwamakholwa ngobungcwele," esho.

 NguPhindi P, ongomunye wabaculi abazoshiyela inkundla noSinach ekhonsathini.

 Le ntokazi izobe iphelezelwa ngabaculi baseNingizimu Afrika okubalwa kubo uPhindi P, uJoseph Jili, uCrystal T noJazz Sardinne.

USinach uqhuba athi: "Sizodumisa ngezingoma ezintsha kanjalo nezindala, siphinde sabelane nangeZwi. Ngizobe ngenza lokho uNkulunkulu angithume khona," kuqhuba yena.

ULinda Zulu-Sayineti ongomunye wabahleli balo mcimbi, uthi lo mcimbi ulungele wonke umuntu.

"Imindeni, amaqembu esonto nalabo abafuna ukujula ebudlelwaneni babo noNkulunkulu. Uma ufuna ukuvuseleleka, ukuphulukiswa, noma ukugcwaliswa okusha ngomusa kaNkulunkulu, le khonsathi izoguqula impilo yakho," esho.

Amathikithi aseyatholakala eQuicket, asukela ku-R80 awe-general, kanti awe-VIP aqala ku-R300.