Uphendule iPirates ihawu umqeqeshi weChiefs

UGCINE eseduduzwa ngu-ballboy weSiwelele FC uMfundo Vilakazi weChiefs emuva kokuba bedliwe.

ISITHOMBE NGABE: BACKPAGEPIX

Mfanafuthi Ndlovu

UPHENDULE i-Orlando Pirates ihawu lokuvika uCedric Kaze ongumqeqeshi weKaizer Chiefs, edaxabulwe yiSiwelele FC ngo-2-0 koweBetway Premiership ngoLwesithathu ebusuku eDr Petrus Molemela Stadium, eBloemfontein.

Amagoli eSiwelele FC eze noTebogo Potsane ngomzuzu ka-6, noSiphesihle Jeza - obeyiphela endlebeni ezitobheni zeChiefs ngoka-26.

Lo mphumela uphoxe abalandeli beChiefs abebehambela phezulu emuva kokuba ezabo zibambe iPirates ngo-1-1 koweligi ngoMgqibelo eFNB Stadium, eGoli.

IPirates ilwela ukuhlwitha iligi kwiMamelodi Sundowns, kanti abathandi beChiefs bancamela ukuthi lesi sicoco sigoduke neDowns ngoba iBucs iyizimbangi zabo ezinkulu.

Kungena eleDowns nje, izokwamukela iChiefs koweligi ngoLwesithathu ngo-19h30 eLoftus Stadium, ePretoria.

IChiefs iyawadinga amaphuzu alo mdlalo njengoba ilwela ukuqeda endaweni yesithathu kwi-log ukudlala kwiCaf Confederation Cup ngesizini ezayo. IDowns iwafuna ephelele ukuvikela isicoco seligi.

UKaze utshele abezindaba ukuthi bahlulwe yiSiwelele ngenxa yokuthi abadlali bakhe bakhanywe kakhulu yiSoweto Derby, okucace ngesiwombe sokuqala.

Uthe bazamile abadlali bakhe ukubuya ngesesibili, kepha amandla abesephelile.

Uthe okumqoka manje wukuqala amalungiselelo omdlalo neSundowns, abheke obukhulu ubunzima nakuwona.

"Lona bekuwumdlalo weziwombe ezimbili. Sizamile ukwakha amathuba okushaya amagoli, kepha izinto zangasivuma. Sijeziswe ngamaphutha ethu kulo mdlalo.

"Sikhombise isikhathi sesidliwe yinja ukuthi nathi siyawafuna amaphuzu kulo mdlalo. Sekumele silwele ukudlula kulesi simo esikusona. Mhlawumbe bekufanele sishintshe isikwati sethu kulo mdlalo ozayo," esho.

UZE wadukelwa yibhola uLebohang Maboe weChiefs ezama ukuxina uPogiso Sanoka weSiwelele koweligi ngoLwesithathu ebusuku.

ISITHOMBE NGABE: BACKPAGEPIX

Uthe kufanele abadlali baqikelele kule midlalo ezayo, ngoba ubone sengathi imiqondo yabo ibingekho kulo weSiwelele.

Kulo mdlalo iChiefs yenze izinguquko ezimbalwa, kungena uReeve Frosler endaweni ka-Aden McCarthy, othintekile.

Abanye abadlali beZimpofana abathole ithuba lokudlala besuka ebhentshini, nguMfundo Vilakazi no-Asanele Velebayi.

IChiefs ingase ibhekane neSundowns inezinguquko ezimbalwa kwazise oweSiwelele uphele kubonakala sengathi ubesethintekile unozinti wayo, uBrandon Peterson, okungenza kubonakale uBryce Bvuma ezintini.