YINKOSI uSimphiwe Zuma, engomunye wabasolwa ecaleni lokubulawa kwekhansela leDA.

Phumlani Gama

IHLULEKILE wukuzibamba, yakhihla isililo phakathi ebhokisini labasolwa iNkosi yesiZwe saKwaNxamalala, eMpendle, uSimphiwe Eric Zuma (56) engumsolwa wesine kwabawu-5, ababhekene necala lokubulala uMnu Nhlalayenza Ndlovu owayeyikhansela leDA, engusotswebhu kaMasipala uMngeni.

Umufi wathelwa ngoyaba lwezinhlamvu phambi kwamalungu omndeni wakhe eMpophomeni, eHowick ngoDecember 2023.

Iqembu lakhe lakhipha umehlokaboni owagcina usufinyelele esigidini. Leli qembu labuye laqasha umphenyi ozimele, ongaphansi kwe-AfriForum, ukuba abambisane nophenyo lwamaphoyisa aseNingizimu Afrika.

Kuleli cala kwaboshwa uMnu Thobani Hlongwa, uMnu Khayelihle Shabalala, iNduna yaseMpophomeni uMnu Zwelithini Buthelezi, iNkosi uZuma noMnu Thabo Mathonsi; okuvela ukuthi wahlela ukubulawa kukamufi esejele.

INduna uButhelezi - esiphenduke ufakazi wombuso - ibingekho phakathi kofakazi abebevele enkantolo. Yona neNkosi uZuma, babhekene nelinye icala lokubulala.

INkosi uZuma ingaphandle ngebheyili ka-R25 000 ngecala lokubulawa kukandunankulu wayo, uMnu Qalokunye Zuma.
Iboshwe ngoLwesithathu kungakapheli ngisho inyanga idedelwe ngebheyili - njengoba idedelwe mhla ka-9 kuJuly.

ILANGA Lempelasonto lithole ukuthi bobabili abafi - ikhansela uNdlovu noNdunankulu uZuma - bawuzalo lwenkosi.
UZuma ungumfowabo wenkosi ngokozalo, uNdlovu ungumshana wayo.

YINKOSI uZuma eboshelwe elokubulawa kwekhansela leDA, isanda kuphuma ngebheyili kwelinye icala lokubulala.

UMnu Simo Ndlovu ongumfowabo kamufi, utshele leli phephandaba ukuthi kubashaqisile ukuboshwa kwenkosi.

"Besingakaze sicabange ukuthi kungenzeka ukuba iyathinteka kuleli cala. Okwenza ukuthi singasoli lutho, wukuthi ibihlale isibuza ukuthi kuqhubekani ngophenyo.

"Umndeni wakithi uyothola ukuphumula mhla kwagwetshwa bonke abathintekayo kulolu daba. Umfowethu uNhlalayenza uzalwa nguNkz Gloria Zuma ongudadewabo wenkosi.

 "Inkosi engumsolwa namuhla, yayisebenzisana naye umfowethu uNhlalayenza," kusho uNdlovu.

Ngaphandle nangaphakathi enkantolo, bekukhona amalungu omphakathi naweDA, abaholi baleli qembu namalungu omndeni wasendlunkulu yesizwe saKwaNxamalala, eMpendle.

Kuvele ukuthi ukuboshwa kwenkosi kusihlukanise phakathi isizwe.

Phakathi kwabaholi beDA abebesenkantolo, kubalwa noMnu Francois Rodgers ongumholi wayo KwaZulu-Natal, noMnu Christopher Pappas oyimeya yaseMngeni - othe leli qembu lizoqhubeka nokweseka umndeni wakwaNdlovu kuze kube sekugcineni.

"Sibonile ekhala (inkosi) ethi uyagula. Konke lokhu kasikukholwa, sibona sengathi uzama ukubambezela uphenyo. Siyakholwa wukuthi leli cala lizoshesha ngoba sikholwa wukuthi sekufike ekugcineni ngabasolwa okufanele baboshwe," kusho uPappas.

Inkantolo inqume ukulihlehlisa icala ngoba ummeli wenkosi uveze ukuthi iyadunguzela.
 Inkosi iqale ngokwesula izinyembezi ngezandla, yagcina isikhipha i-tissue ephaketheni, yasebenzisa yona.
Abanye bebelibeka ngembaba elokuthi ikhala izinyembezi zengwenya.

Abemithombo yezindaba bebengavunyelwe ukuthwebula izithombe ngaphakathi enkantolo.