Izofaka isifundo sesintu ingoma yezitshudeni

Mthobisi Sithole

IZOGQAMA ngesifundo sesintu ingoma yezitshudeni yalo nyaka, okuhloswe ngayo ukuvuselelwa kwesintu emanyuvesi. Lesi sifundo kulindeleke ukuba senziwe ngosolwazi base-University of KwaZulu-Natal (UKZN), kubuyiselwe izitshudeni kwimvelaphi yesintu.

Le ngoma ezokwenzeka mhla ka-16 kuNcwaba (August) ophikweni e-Edgewood Sports Field, e-UKZN, kudidiyelwe izikhungo zemfundo ephakeme okubalwa kuzona iDurban University of Technology, iMangosuthu University of Technology, i-University of Zululand, i-University of Johannesburg, iCoastal College, i-eLangeni College,
i-eThekwini College, i-University of Pretoria nezinye izikhungo.

Umhleli wale ngoma, uMnu Sanele "Phoyisa" Hlongwa, uthi iphupho lokuhlanganisa izitshudeni ngokwengoma, lifike kuyena ngo-2019 ngesikhathi eqhwakele isikhundla sokuba ngumengameli weStudent Representative Council (SRC),
e-UKZN.

"Ngibuke ukuthi abafundi abaningi esebekwazi ukungena ezingeni lezemfundo ephakeme kubalwa nalaba abaqhamuka emakhaya ezikoleni ezibizwa ngoQuintile -1 kuya ku-3 okuyinto ekade ingenzeki phambilini.

"Emakhaya izingane zikhule ziqoqwa ngesintu, nangokugida ingoma ukuqhakambisa isiko, obekusiza ekuzivikeleni ezintweni eziningi  ezibulala umphakathi. Ukuqhakambisa ubuntombi nokugida ingoma kwabesifazane nabesilisa, bekusiza ekutheni bangazitholi sebecwile ophuzweni oludakayo, bavikeleke ezifweni ezinye zazo okungezocansi eziyingozi, ukubavikela ekuzibandakanyeni nobugebengu nakwizidakamizwa, okuyizinto ezibulala ikusasa lentsha yakithi," kusho uHlongwa.

Uthi ngokujwayelekile intsha esuka emakhaya ifike ididwe wubukhazikhazi bemfundo ephakeme abanye begcina bekhohlwa yimvelaphi yabo namakhaya abasuka kuyo, kanye nemiphakathi ekumele bayoyithuthukisa uma bephothula izifundo zabo zemfundo ephakeme.

Uthi yilokho okwenze kwasungulwa le ngoma ukuqoqa zonke izitshudeni, ukuzikhumbuza umsuka wazo nendlela ezikhule ngayo ukuze zizoqhubeka nokuzinakekela, zibuyele emakhaya ziyothuthukisa imphakathi ezisuka kuyo ngolwazi nangemibono eyisa isizwe phambili.

Uveze ukuthi bazobe besebenzisana noMnyango kaNgqongqoshe wezeMpilo KwaZulu-Natal, uNkk Nomagugu Simelane-Mngadi ukuze lo mnyango uzoba seduze ekulekeleleni abafundi abadinga usizo kwezempilo ngokuhlukana kwalo usizo.

"Kuzobe kukhona nodokotela abahlukene ngosuku lomcimbi ukuze bakwazi ukulekelela ekuhlinzekeni abafundi bethu ngezempilo,  beluleke abafundi ukuthi bengenza kanjani ukuze kuliwe nokukhula kwegciwane lesandulela-ngculazi entsheni, ukulwa nengcindezi ecindezela abafundi abaningi," kusho uHlongwa.

Uthi kuzobekwa eqhulwini nodaba lokulwa nokuhlukunyezwa kwentsha ngokobulili (GBV).
Zonke izitshudeni ezisuka esikhungweni zemfundo ephakeme zamukelekile ukuba yingxenye yalolusuku, kodwa kufanele ziphathe izigqebhezane (Student Card) eziveza ukuthi ziyizitshudeni ngempela, ukuze zikwazi ukungena emcimbini. Kungenwa mahhala.

Lo mcimbi wesekwe yiphephandaba ILANGA, uMnyango wezeMpilo KwaZulu-Natal nezikhungo zemfundo ephakeme.
mthobisis@ilanganews.co.za