NGU-KHALIL Ben Youssef obambe kwesomqeqeshi weChiefs.

ISITHOMBE NGABE: BACKPAGEPIX

Senzo Sokhela

UXOLISILE wenza nesethembiso umqeqeshi weKaizer Chiefs, uKhalil Ben Youssef ngesikhathi le kilabhu ilahla amaphuzu amqoka ngaphambi komdlalo obalulekile weCaf Confederation Cup. 

IChiefs izobhekana neKabuscorp yase-Angola emlenzeni wesibili wesigaba sokuqala sokuhlunga seCaf Confederation Cup ngoMgqibelo ngo-15h00 eFNB Stadium, eSoweto.

Ihlulwe ngo-1-0 yile kilabhu emlenzeni wokuqala obungeledlule ekuhambeni.

Iya kulo mdlalo nje, ibambane neMarumo Gallants ngo-1-1 koweBetway Premiership ngoLwesithathu eFNB Stadium.

Igoli leChiefs lishaywe nguKhanyisa Mayo, kwathi eleMarumo labhakuziswa nguJaisen Clifford obengakaqedi ngisho imizuzu ewu-5 engenile ngesiwombe sesibili.

IChiefs ike yathola iphenathi kulo mdlalo, kodwa uGaston Sirino wahluleka ukuyiqabulisa inethi, yavinjwa ngunozinti weGallants, uWashington Arubi.

NGUMGADLI weChiefs, uKhanyisa Mayo obingelele abalandeli bale kilabhu ngegoli ibhekene neMarumo Gallants. Lapha utatamisa uzakwabo uGaston Sirino ogeje iphenathi.

ISITHOMBE NGABE: BACKPAGEPIX

UYoussef obambe izintambo zokuqeqesha kwiChiefs, uxolisile wabe esenza isethembiso ngomdlalo wangoMgqibelo.

"Lo mdlalo bekufanele siwunqobe, izimbangi zethu bezingasenzi lutho, yithina nje esizishwebele amathuba umdlalo kungowethu.

"Bebekhahlela bengaphandle kwebhokisi, ubona nangegoli abalitholile ukuthi ngelenhlanhla.
"Kodwa-ke kufanele sidlule kokwenzekile siyolungiselela umdlalo wethu wangoMgqibelo.

"Siyaxolisa kubalandeli ngokwenzeke kulo mdlalo, kodwa ngiyathembisa ukuthi ngoMgqibelo sizobajabulisa," kusho uYoussef.