UXoki uphawula ngenhlanhla yePirates kwiNedbank

NGUTHAPELO Xoki (kwesobunxele) noKhomotso Marebane weCasric Stars ngesikhathi kuqhathwa amakilabhu azogadulisana kwiLast 16 yeNedbank Cup.

ISITHOMBE NGABE: BACKPAGEPIX

Senzo Sokhela

UPHAWULA ngenhlanhla yokutonyulwa namakilabhu adlala esigabeni esingaphansi kwesabo kwiNedbank Cup yangale sizini umdlali we-Orlando Pirates, uThapelo Xoki.

IPremier Soccer League (PSL) iqhathe amakilabhu azotholana kwiLast 16 yeNedbank Cup emcimbini obuseGoli ngoLwesithathu ebusuku.

IBucs iphinde yanyelwa yinyoni esandleni itonyulwa ekhaya neCasric Stars edlala kwiMotsepe Foundation Championship.

Kuzokhumbuleka ukuthi kwi-last 32 itonyulwe neTshakhuma FC edlala kwi-ABC Motsepe League eLimpopo.

IBucs inenebule le kilabhu ngo-4-1 eMoses Mabhida Stadium, eThekwini, ngeledlule.

Ukuqhathwa kweBucs namakilabhu asesigabeni esiphansi kunesayo, kushiye imibuzo kubalandeli ezinkundleni zokuxhumana njengoba besola ugcobho.

Bathi ngathi kunokwenzelela kule kilabhu eholwa ngu-Irvin Khoza ongusihlalo wePSL.

NGUXOKI weBucs exine uFrancois Baloyi weDondol Stars ngesikhathi la makilabhu ebhekene koweNedbank ngo-2023.

UXoki ebuzwa ngale nhlanhla engaka elokhu ibehlela uthe: "Okokuqala nje, kasiyona ingxenye yabantu abaqhatha amakilabhu.

"Kodwa abantu okufanela bakwazi wukuthi la makilabhu kawekho lula. IDondol Stars isiyise kumaphenathi, kanti i-Orbit isadlala esigabeni esiphansi, ike yasikhipha kulo mqhudelwano.

"Maningi amakilabhu adlala kwiPremiership aseke akhishwa yilawa adlala ezigabeni eziphansi phambilini.

"Yibona ubuhle balo mqhudelwano lobo, bunika la makilabhu asesigabeni esiphansi ithuba lokubhekana nezinkunzi. Uma uzowathatha kancane, azokuwashisa ijezi."

Phakathi kwamakilabhu eBetway Premiership aseke ashaqiswa ngamakilabhu adlala ezigabeni eziphansi, kubalwa iKaizer Chiefs eyakhishwa yiBaroka FC isadlala kwi-ABC Motsepe League, isabizwa ngeVodacom League ngo-2011. 

Amakilabhu azobhekana kwiNedbank Cup Last 16 esewonke aqhathwe kanje:
Milford vs Mkhambathi;
Lamontville Golden Arrows vs Stellenbosch;
University of Pretoria vs Sekhukhune United;
Jacksa Spears vs Vasco da Gama;
TS Galaxy vs Mamelodi Sundowns;
Upington City vs Durban City;
Richards Bay vs AmaZulu;
Orlando Pirates vs Casric Stars.

Izinsuku, izikhathi nezindawo kusazomenyezelwa. Nokho kuqinisekisiwe ukuthi le midlalo izogijinywa ngempelasonto yomhla ka-20-22 kwephezulu.