23 | Ezemidlalo
Friday, 27 June 2025
Siyazishwashwatha
01
Ukhonjwa oSuthwini obepheka iDurban City
NGUSIMO Dladla edla amathambo engqondo ebhentshini leDurban City.
ISITHOMBE NGABE: BACKPAGEPIX
UMATANISWA namaZulu FC uSimo "Govuza" Dladla osanda kwehlukana neDurban City ayenyusele kwiBetway Premiership.
Leli phephandaba lithole ukuthi uSuthu luhlela ukuqala izingxoxo maduzane noDladla ukuyokuba ngumsizi wokuqala ka-Arthur "10111" Zwane oyinhloko yabalolongi kule kilabhu ezodlala iMTN8 ngesizini ezayo njengoba iqede isizini edlule ibambe unombolo 6 kwi-log.
UZwane waqashwa kulesi sikhundla ebambisene noVusumuzi "Kanu" Vilakazi, owabuye washiya isigubhukane, okwenze waqhubeka yedwa ekubeni yinhloko u-10111.
Kungena elikaKanu nje, useqashwe yiKruger United edlala kwiMotsepe Foundation Championship (MFC).
02
UMaart usazohlala kwiChiefs osekufike 'noJesu' kuyona
NGU-YUSUF Maart.
ISITHOMBE NGABE: BACKPAGEPIX
UVUSELELE inkontileka yakhe ngeminyaka emibili uYusuf Maart ongukaputeni weKaizer Chiefs ezolibangisa eNetherlands ukuyokwenza amalungiselelo esizini ezayo.
Le nkontileka inombandela wokwelulwa ngomunye unyaka uma zombili izinhlangothi ziseneme.
IChiefs ngoLwesine ilande esikhumulweni sezindiza umdlali wayo omusha, u-Ethan Chislett obedlala kwiPort Vale egijima esigabeni esincane e-England.
Lo mdlali abathandi beziMpofana bamfanisa noJesu uqobo njengoba bethi uzoxazulula inkinga yamagoli kule kilabhu.
Wenezela kubadlali abasanda kusayiniswa yile kilabhu okunguThabiso Monyane noPaseko Mako abavela kwi-Orlando Pirates, u-Asavele Velebayi osuka kwiCape Town Spurs no-Etiosa Ighodaro obedlala kumaZulu FC, abemeboleke kwiMamelodi Sundowns.
03
Ijikiswe seyisekhempini yeBay FC indodana kaTso Vilakazi
NGU-THATO Mohlamme.
ISITHOMBE NGABE: BACKPAGEPIX
UJIKISWE esefikile ekhempini yeRichards Bay FC uThato Mohlamme oyindodana kaBenedict "Tso" Vilakazi.
UThato ubegijima kwiBay ayijoyine esuka kuThongathi FC olwadayiselwa iMilford FC eminyakeni embalwa edlule.
Kuvele nezithi uSalim Magoola wase-Uganda, ongunozinti, akakaze abonakale ejimini yale kilabhu eqale kuleli sonto.
04
Ixoshe abadlali abawu-10 iMilford FC esazocijwa ngumnikazi
NGU-LEFA Hlongwane.
ISITHOMBE NGABE: BACKPAGEPIX
IMILFORD FC ichithe abadlali abawu-10 okubalwa kubona uDiamond Thopola, uThobani Mncwango, uLefa Hlongwane, uThobela Sikhakhane, uVuyo Macina, uMakhetha Tsotetsi, uShane Saralina, uSiseko Gunya, uBongani Nkone noNqobani Zulu.
Kuthiwa uDkt Xanti Pupuma ongumnikazi wale kilabhu, usazoqhubeka nokuzibambela ekubeni ngumqeqeshi wayo, kuthi uMichael Gumede abe yisekela lakhe.
05
Owe-AM uhlose ukuvulela intsha amathuba okudlala kwiPSL
UHLOSE ukuvulela intsha amathuba okudlala kwiPremier Soccer League (PSL) uMlungisi Sikhakhane obegijima kwiRoyal AM eseyashabalala njengoba ehlela imidlalo engoMgqibelo eShakaville Sports Grounds, KwaDukuza.
Kuthiwa le midlalo izozinyaziswa ngabadlali bePSL okubalwa kubona uMfundo Thikazi, uSphiwe Mcineka, uSbangani Zulu noLindokuhle Zikhali beRichards Bay FC, uSiphesihle Msomi we-Arrows, u-Andile Mpisane noKhetha Ndlovu be-AM ukubala nje abambalwa.
USikhakhane uthi uzizwa ethobekile ngokuhlela lo mqhudelwano ahlose ukuvundulula intsha enekhono kunobhutshuzwayo kuwona.
Ilanga Lempelasonto