19 | Ezemidlalo
Friday, 12 September 2025
Siyazishwashwatha
01
Kumfake ugqozi ukushiywa esikwatini seBafana umgadli weBucs
U-EVIDENCE Makgopa (osesithombeni), ongumgadli we-Orlando Pirates, uthi kumvule amehlo ukushiywa ngaphandle kwiBafana Bafana njengoba beyidlala eyokuhlungela iNdebe yoMhlaba yeFifa neLesotho neNigeria ngokwahlukana.
Uthi okwenzekile kuyamphoqa ukuba aqale asebenze ngokwengeziwe ukuze abuyele eqenjini lesizwe.
02
Owachithwa yiDowns wethulwe yikilabhu yaseSaudi Arabia
UMDLALI waseMorocco oke wagijima kwiMameodi Sundowns, u-Abdelmounaim Boutouil (27) (osesithombeni) - osanda kuxoshwa yiWydad Casablanca - wethulwe ngokusemthethweni yi-Al Hazem yaseSaudi Arabia.
03
Oxoshwe yiBucs ujima neDurban City ehlabane ngoweSundowns
UZAMA inhlanhla kwiDurban City uKatlego Otladisa (28) (osesithombeni), osanda kukhonjwa indlela yi-Orlando Pirates.
IDurban City kuthiwa ishaya indesheni nakwiCape Town City - egencwe yizembe ngesizini edlule kwiBetway Premiership - ukuba iyidayisele uLuphumlo "Kaka" Sifumba (20) odlala esiswini.
Kusenjalo, iCity seyiqede konke noTerrence Mashego odlala emuva ngakwesobunxele, emebolekwe yiMamelodi Sundowns.
Kubhekwe ukuba lo mdlali abonakale uma iCity isibhekene neSiwelele FC koweBetway Premiership ngoLwesibili ngo-19h30 eChatsworth Stadium, eThekwini.
04
Uzanyelwa isikhala kwiChippa owake wadlala kwiChiefs
NGUSIBUSISO Mabiliso esadlala kumaZulu FC - egadulisa uThabo Mnyamane owayedlala kwiTshakuma Tsha Madzivhandila.
ISITHOMBE NGABE: BACKPAGEPIX
UZANYELWA inhlanhla kwiChippa United uSibusiso Mabiliso owake wadlala kwiKaizer Chiefs nakumaZulu FC, ongenawo umsebenzi njengamanje.
Ugcine ukubonakala kwiBaroka ngesizini edlule, kodwa akangayiqeda njengoba igcine isimdedela.
05
INew Zealand ingase ishiye kukhalwa kwawombhoxo akuleli
NGUSAMISONI Taukei'aho weNew Zealand ezama ukudlubulundela kubadlali bamaBhokobhoko.
ISITHOMBE NGABE: BACKPAGEPIX
INGASE ishiye kukhalwa eNingizimu Afrika iNew Zealand njengoba izohlasela kwabesilisa nakwabesifazane emidlalweni yombhoxo ebhekwe ngamehlo abomvu ngoMgqibelo.
Ekuseni, kuvula amaqembu abesilisa ngo-09h05 koweCastle Lager Rugby Championship, kuthi ngo-14h00 kubhekane awesifazane kwi-quarter final yendebe yomhlaba yabalobu bulili eqhubeka e-England.
Amathuba okwenza kahle kwawakuleli abukeka emancane kakhulu kuyona yomibili le midlalo uma kubhekwa ifomu yezitha ezivutha zingabaselwe kulezi zinsuku kubo bobubili ubulili.
Ilanga Lempelasonto