Siyazishwashwatha

NGUTEBOHO Mokoena ezama ukuvimba ibhola likaTswarelo Bereng weLesotho.

ISITHOMBE NGABE: BACKPAGEPIX

I-FIFA seyethweswe icala iSafa noTeboho Mokoena ngokusemthethweni ngokuboshelwa kwalo mdlali emdlalweni womlenze wokuqala neLesotho - owawinwa ngelakuleli ngo-3-0 - ekubeni wayenamakhadi amabili aphuzi, ayemphoqa ukweqiwa wumdlalo owodwa.

Incwadi yeFifa ebheke kwiSafa ifike ngomhla ka-15 wale nyanga, kanti bobabili iSafa noMokoena banikwe izinsuku eziwu-6 ukuphendula le ncwadi ephuma ekomidini lezigwegwe leFifa.

 Uma ingalahlwa yicala iSafa, iBafana ingaphucwa amaphuzu amathathu okungenza isale nawu-14 esicongweni sikaGroup C.

Ingalingana neBenin enamagoli amancane kunelakuleli. Nokho kungadingeka ukuba iBafana inqobe imidlalo emibili ezoyidlala ngo-October neZimbabwe naneRwanda ukungena kulo mqhudelwano ozokuba seMelika, eCanada naseMexico ngonyaka ozayo.

IBenin isazodlala naneNigeria.

UMQEQESHI weMamelodi Sundowns, uMiguel Cardoso, uqinisekise ukuthi uThemba "Mshishi" Zwane (35) (osesithombeni), uzohlala inyanga yonke engalidlali ibhola ngenxa yokuphinda alimale.

UZwane udonseke imisipha iDowns ibhudluza iMagesi FC ngo-3-0 koweBetway Premiership ngeSonto eLucas Moripe Stadium, e-Atteridgeville.

Ulimala kulo mdlalo nje, bekuwumdlalo wakhe wokuqala ekhuza ibuya njengoba ebevele engekho ngenxa yakho ukulimala.

ULUBALUBELA ukubhakuzisa inethi bebhekene neMamelodi Sundowns umgadli obingelele ngegoli kwiDurban City, uLetsie Koapeng. Lo mdlali ushaye igoli elihle iCity ihlula iSiwelele FC ngo-2-0 koweBetway Premiership ngoLwesibili eChatsworth Stadium.
"Ngisemusha, ngisafuna ukungena kahle eqenjini. Nginethemba lokuthi nasemdlalweni weDowns ngizolishaya igoli. Phela ukushaya amagoli kwenyusa nokuzethemba," esho. Umdlalo weDowns neCity uzokuba ngoMgqibelo ngo-20h00 eLucas Moripe Stadium, e-Atteridgeville. Uthi usebenza kanzima ejimini njengoba efuna ukusiza le kilabhu izinze kulesi sigaba engomakoti kusona.

YISEKELA lomqeqeshi weBafana Bafana, uHelman Mkhalele, nomqeqeshi waleli qembu uHugo Broos bejabula emuva komdlalo neLesotho, abawunqobe ngo-3-0.

ISITHOMBE NGABE: BACKPAGEPIX

IBAFANA Bafana yenyukele kunombolo 55 ohlwini lweFifa lwamazwe enza kahle emhlabeni, okuyindawo enhle kusukela ngo-2014 eyayihleli kunombolo 52 ngawo.

Ukunyakaza kweBafana - isuka kunombolo 56 - kudalwe yimiphumela emihle eyithole emidlalweni yakamuva yokuhlungela iNdebe yoMhlaba yeFifa, lapho ihlule khona iLesotho ngo-3-0, yabambana neNigeria ngo-1-1.

UGCINE eshiywe ngaphandle uMbekezeli "TLB" Mbokazi (19) oyisitobha se-Orlando Pirates esikwatini samaJita (SA U/20), esizodlala kwiNdebe yoMhlaba yeFifa ka-U/20 ezokuba seChile kusuka mhla ka-27 wale nyanga, isongwe mhla ka-28 ku-October.

I-TLB kuvele ukuthi ifuna ukugxila ekudlaleni kwiBafana Bafana ukuzibeka ethubeni elihle lamadlelo aluhlaza aphesheya.

Seyigijime imidlalo emithathu, kanti oweNigeria yawuqala yaze yawuqeda, futhi yaqokwa njengomdlali wosuku.

Simi kanje isikwati samaJita esizobamba iqhaza kweyendebe yomhlaba:-