Bagaqele umgadli obuye ngeshodi kwiBucs

NGU-BOITUMELO Radiopane okuvela ukuthi kunamakilabhu amgaqele.

ISITHOMBE NGABE: BACKPAGEPIX

Senzo Sokhela

UGAQELWE ngamakilabhu amabili agijima kwiBetway Premiership uBoitumelo "Radio" Radiopane ongumgadli we-Orlando Pirates egila izimanga selokhu kuqale isizini, njengoba seyinqobe izinkomishi ezintathu.

ILANGA Lempelasonto lithole ngemithombo yalo ukuthi lo mgadli ufunwa yiSekhukhune United ne-Orbit College.

URadiopane ushaye elinye lamagoli iBucs iguqisa iCarling All-Stars ngo-2-0 koweCarling Cup ngeledlule eMoses Mabhida Stadium, eThekwini.

Ushaya leli goli nje, kudala wagcina ukubonakala enkundleni. Kuzokhumbuleka ukuthi kuqala isizini, umqeqeshi weBucs, u-Abdeslam Ouaddou ocija iBucs ubekholelwa kuyena, emqalisa imidlalo.

IBucs ithole induku emidlalweni emibili yokuqala yeligi, bakhononda abalandeli bethi makakhishwe. Ukhishiwe.

NGU-RADIOPANE enozakwabo, uRelebohile Mofokeng.

ISITHOMBE NGABE: BACKPAGEPIX

Nokho kuvela ukuthi iSekhukhune ne-Orbit bayamfuna. Bamfuna nje, u-Ouaddou ucula ingoma emnandi ngaye.

"ISekhukuune ne-Orbit bayamfuna lo mdlali. Kabafuni ukumthenga ngokugcwele, bafuna ukumeboleka kuze kuphele isizini ukuze ezothola ithuba lokudlala.

"Kodwa konke cishe kuyocaca uma amakilabhu esevulile ngoba wonke avalile njengamanje, abantu basemaholidini," kusho umthombo waleli phephandaba.

Imizamo yokuthola ukuphawula kwala makilabhu iphunzile njengoba izingcingo zezikhulu zawo bezikhala, kodwa zingabanjwa.

U-Ouaddou uthe: "URadio ungumdlali osemncane owenza kahle. Ubenza kahle kakhulu senza amalungiselelo okuqala kwesizini eSpain.

"Kuzokhumbuleka ukuthi kuqala isizini besimqalisa, waba nokuthinteka okuncane okuphoqe ukuba simvikele. Simunikile ithuba wangakora, ngebhadi kwangena omunye endaweni yakhe wafika wenza kahle.

"Abagadli bami bayazi ukuthi kangidingi nje igoli kuphela kubona, kuningi engikubhekayo. Kufanele ngikubone ukuthi yini oselekelela ngayo uma ibhola lingekho ngakithi. Kufanele nawe usebenze, kakusho lutho ukuthi ungumgadli."