IPirates iyazethemba ukushanela kwasani kule sizini

NGUNKOSINATHI Sibisi (ophethe indebe) ejabula nozakwabo emuva kokuqukula isicoco seMTN8, emuva kokuhlula iStellenbosch FC ngo-3-1.

ISITHOMBE NGABE: BACKPAGEPIX

Senzo Sokhela

UKAPUTENI we-Orlando Pirates uNkosinathi "Bhodlela" Sibisi ukholwa wukuthi le kilabhu isesimweni esihle ukuthatha zonke izinkomishi ezozidlalela kule sizini kubalwa neCaf Champions League.

IBucs izobhekana neLioli yaseLesotho emlenzeni wokuqala wokuhlunga weCaf Champions League ngoMgqibelo ngo-15h00 eToyota Free State Stadium, eBloemfontein.

Iya kulo mdlalo nje, ngesizini edlule igeje kancane ukufinyelela kowamanqamu walo mqhudelwano njengoba iphume kuma-semi final, ikhishwa yiPyramids yase-Egypt egcine iwunqoba yehlula iMamelodi Sundowns kowamanqamu.

NGU-RELEBOHILE Mofokeng weBucs nesinye sezisebenzi zasenkundleni "bengcolisa" inkundla emuva kokuba iBucs inqobe owamanqamu weMTN8.

ISITHOMBE NGABE: BACKPAGEPIX

USibisi uthi ukhakhayi lwabo seluqine ngokwanele kulokhu ukunqoba noma iyiphi inkomishi abazoyidlalela.

"Ngesizini edlule kusale kancane ukuba sinqobe njengoba senze kahle kwiNedbank Cup (abahlulwe kowamanqamu wayo), kwiligi (belala isibili kwi-log) nakwiChampions League.

"Kodwa kulokhu siyazi ukuthi yini okufanele siyenze. Sonke siyazazi ukuthi sifunani.
"Ngalaba badlali esinabo manje, kungenzeka noma yini, ngikholwa wukuthi sizokufaka ukushisa kwiligi nakuyona iChampions League.

"Sonke siyakholelwa kithina ukuthi sizohamba ibanga elide kulo mqhudelwano," kusho uSibisi.

IPirates iyikilabhu yokuqala kuleli ukunqoba iChampions League, okuwumlando eyawuqopha eminyakeni ewu-30 edlule yehlula i-Asec Mimosa yase-Ivory Coast ngo-3-2 sekuhlanganiswe imiphumela yemilenze emibili.

Phela kwaba ngu-2-2 emlenzeni wokuqala owawuseNingizimu Afrika, iBucs yadlula ngo-1-0 wegoli likaJerry "Legs of Thunder" Skhosana emlenzeni wesibili owawuse-Ivory Coast.