IPirates ihlonyiswa ngamasu okucoboshisa izitha

NGUMQEQESHI weChippa United, uLuc Eymael ocebisa iPirates nge-Eloi Lupopo ake wayiqeqesha.

ISITHOMBE NGABE: BACKPAGEPIX

Senzo Sokhela

I-ORLANDO Pirates ihlonyiswe ngamasu okugudluza izitha eqhathwe nazo kwiCaf Champions League njengoba izodlala neSt Eloi Lupopo yaseDemocratic Republic of Congo (DRC) emdlalweni womlenze wokuqala wesigaba sesibili sokuhlungela lo mqhudelwano.

La makilabhu azoshukana ngeSonto ngo-15h00 kulo leliya lizwe.

ULuc Eymael ololonga iChippa United - nguyena ofake iLupopo kule midlalo esangumqeqeshi wayo ngesizini edlule.

NGABADLALI bePirates ezobhekana ne-Eloi Lupopo koweCaf.

ISITHOMBE NGABE: BACKPAGEPIX

Engxoxweni abe nayo naleli phephandaba, u-Eymael uxwayise iBucs ngobungozi engase ibhekane nabo kule kilabhu.

"Yimina ofake iLupopo kwiCaf, ngiyifice idonsa kanzima, ngayivusa kodwa ngayishiya ekuqaleni kwesizini ngenxa yezinkinga ezithile. Ibisangidinga, kodwa nganquma ukujoyina iChippa.

"Ngiyishiye neqembu elihle, iPirates kuzofanele ibagade, ikakhulukazi phambili ngoba inabagadli abakhaliphile.

"Kuzofanele ibahlasele ijeqeza ngoba uma izokuya phambili yonke ngamandla, ingazithola isenkingeni. Kodwa-ke iPirates ingabuya newini kulo mdlalo, yiyona engiyibona isethubeni," kusho u-Eymael.

NGABADLALI beChiefs engelinye lamathemba eNingizimu Afrika kwiConfederation Cup.

ISITHOMBE NGABE: BACKPAGEPIX

* Komunye umdlalo weCaf Champions League, iMamelodi Sundowns izogadulisana neRemo Stars yaseNigeria emlenzeni wokuqala wesigaba sesibili sokuhlungela iChampions League ozokuba ngeSonto ngo-17h00 kulo leliya lizwe.

* KweyeCaf Confederation Cup, iKaizer Chiefs izovakashela iSimba yaseDRC ngoMgqibelo ngo-15h00 eDRC.

IStellenbosch FC izotholana phezulu ne-15 De Agosto yase-Equatorial Guinea ngoMgqibelo ngo-17h00.