NGUTHAMI Ntuli ongundunankulu waKwaZulu-Natal.

Mzwamandla Zondi

KUNGASE kubonakale uNdunankulu waKwaZulu-Natal, uThami Ntuli kwiSA Men Run 10km ehlanganise ne-5km ezokuba ngeSonto elizayo lomhla ka-5 kuNtulikazi (July), ezosukela iphinde iphelele eKings Park Athletics Stadium, eThekwini.

Lo mjaho ILANGA eliyingxenye yawo, uhlelelwe abesilisa bodwa kanti inhloso yawo wukulwa nokuhlukunyezwa kwabesifazane nezingane.

Uhlelwe yiSisonke Athletics Club ibambisene noMike "Big Mike" Nzimande weVuma FM.

NGUMNTOMUHLE Khawula ongungqongqoshe wezemidlalo KwaZulu-Natal.

Omunye wabaqinisekisile ukuthi bazokube bekhona, ngungqongqoshe wezemidlalo esifundazweni, uMntomuhle Khawula okuthiwa uzokube enza i-5km.

UKhawula usanda kubonakala eyingxenye ye-5km kwiNational Youth Run ebingoMgqibelo womhla ka-7 wale nyanga, wandulela iComrades Marathon.
Abadidiyeli balo mjaho bathi konke sekumi ngomumo.

"Sikhulumile nondunankulu, sesilindele ukuba abuyele kithina, kanti uKhawula uthembisile ukuthi uzokube ekhona. Libukeka lilikhulu isasasa nonyaka njengoba sekubhalise abasubathi abawu-500 kanti silindele abawu-1000 kuya phezulu.

"Sizovala ukwamukela imingenelo online mhla ka-1 kuJuly, siphinde sivule ngomhla ka-4 nomhla ka-5, lapho okuzokube kulandwa khona izinombolo eKings Park Athletics Stadium.

"Abasubathi abazokwenza kahle bazohlomula ngemali nezikibha. Umsubathi ozophula irekhodi le-10km (28:31) uzohlomula ngo-R3 000 ngaphezulu, kanti elabahambayo kwi-10km wu-41:30, nakhona kunomklomelo esiwubekile kwabazokwenza irekhodi," kusho uBig Mike.

Uphethe ngokuthi inhloso yalo mjaho wukulwa nokuhlukunyezwa kwezingane nabantu besifazane, nokugqugquzela amadoda ukuba azihlanganise nezemidlalo ngoba indoda ephilayo kayihlukumezi.

Abafuna ulwazi ngalo mjaho bangangena kwi-website ethi: www.eventtiming.co.za.