Mfanafuthi Ndlovu

UGEZEKE igilo umqeqeshi weKaizer Chiefs, uNasreddine Nabi ngesitobha sale kilabhu ebesigijima kwi-Orlando Pirates ngesizini edlule, uPaseka Mako, odlala ophondweni lwesobunxele.

Lesi sitobha sidlale ingcwenga yebhola le kilabhu ibambana neMamelodi Sundowns ngo-0-0 koweBetway Premiership ngoLwesithathu ebusuku eFNB Stadium, eGoli.

IChiefs inomdlalo onzima neLamontville Golden Arrows ngoMgqibelo ngo-17h30 eMoses Mabhida Stadium, eThekwini.

Lo mqeqeshi uveze ukuthi balindele inselelo ehlukile kuBafana Bes'thende njengoba bedlala kahle kulezi zinsuku.

Uthi ngaphandle kukaMako, omunye umdlali omhlabe umxhwele nguThabiso Monyane osivale thaqa isikhala sikaReeve Frosler ophondweni lwesokudla emuva. NoMonyane ubegijima kwiBucs ngesizini edlule.

Uveze ukuthi usamonga uFlavio da Silva wasePortugal, osanda kujoyina le kilabhu njengoba esenesikhathi eside wagcina ukugijima imidlalo emqoka.

NGU-JUNIOR Dion we-Arrows (kwesobunxele) - exinwe nguNkanyiso Zungu weMagesi - okulindeleke ukuba asize ezakhe uma sezibhekene neChiefs.

ISITHOMBE NGABE: BACKPAGEPIX

Echaza ngesimo somkakhe esenze wangaba yingxenye yeChiefs emidlalweni emithathu yokuvula, uthe uyelulama futhi uyaxhumana naye zikhathi zonke ukumeseka njengoba yena esebuyele eNingizimu Afrika.

Uthi okwamanje usagculisekile ngesikwati abanaso, kanti-ke kunabadlali abangakalitholi ithuba, usafuna ukubabona kahle bonke ukuthi bazoyenzelani ikilabhu kubalwa nasemidlalweni yeCaf Confederations Cup, bazosayinisa abanye uma bebona kunesidingo.

Kungena elabadlali abasha nje, le kilabhu yethule ngokusemthethweni uLebohang Maboe ophuma kwiSundowns, ongumgadli.

Isiyonke imidlalo yeBetway Premiership engempelasonto imi kanjena:-
NGOLWESIHLANU
EDr Molemela Stadium: Siwelele FC vs Richards Bay FC 19h30.
NGOMGQIBELO
ESeshego Stadium: Magesi FC vs AmaZulu FC 15h00.
E-Athlone Stadium: Stellenbosch FC vs Mamelodi Sundowns 15h00.
EMoses Mabhida Stadium: Golden Arrows vs Kaizer Chiefs 17h30.
EPeter Mokaba Stadium: Sekhukhune United vs Durban City 17h30.
EDobsonville Stadium: Orbit College FC vs TS Galaxy 20h00.
NGESONTO
ENelson Mandela Bay Stadium: Chippa United vs Orlando Pirates 15h00.
EDr Molemela Stadium: Marumo Gallants vs Polokwane City 15h00.