NGUMWAPE Musonda osefana nedlozi leBlack Leopards.

ISITHOMBE NGABE: BACKPAGEPIX

Mfanafuthi Ndlovu

UBEKE ithemba kubadlali bakhe abanesipiliyoni umqeqeshi weBlack Leopards, uJoel Masutha, emuva kokuba le kilabhu ithushuke esithubeni njengoba isibalwa namakilabhu angadla ubhedu kwiMotsepe Foundation Championship (MFC).

ILeopards izobhekana neCasric Stars koweMFC ngoMgqibelo ngo-15h00 eSolomon Mahlangu Stadium, KwaMhlanga.

Lo mdlalo umqoka kuwona womabili la makilabhu njengoba esethubeni lokuqeda endaweni yama-play off.

NGU-JOEL Masutha ongumqeqeshi weLeopards.

ISITHOMBE NGABE: BACKPAGEPIX

UMasutha utshele ILANGA Lempelasonto ukuthi amathemba akhe usewabeke kubadlali abanesipiliyoni, okubalwa kubo Bethuel Muzeu noMwape Musonda (ukusiza ukuqinisekisa ukuthi le kilabhu inyukela kwiBetway Premieship), ukukhuthaza abadlali abasebancane. UMusonda usefana nedlozi leLoepards njengoba egijime kuyona kusukela ngo-2016 kuya ku-2020, wayishiya, wajoyina iHatta yase-United Arab Emirates emubolekise kwi-Al-Sahel SC yaseSaudi Arabia, ngaphambi kokujoyina iMoroka Swallows (esiwumlando), njengoba esebuyele kwiLeopards. 

"Siwadinga wonke amaphuzu ale midlalo esasele kwazise kusangenzeka noma yini.
Emdlalweni wethu neCasric Stars kufanele sizibambe ziqine, siyihlasele zisuka ebhandeni.

"Kangizimisele ngokufaka abadlali bami ingcindezi engenasidingo, okwabo nje wukuqikelela ukuthi kabavumi kungene igoli ngakithina.
"Kodwa-ke ithemba lami ngilibeke kuMusonda noMuzeu ukukhuthaza laba badlali abasebancane ngoba bona banesipiliyoni,'' kusho uMasutha.

Isiyonke imidlalo yeMFC engempelasonto imi kanje:-
NGOLWESIHLANU
EGelvandale Stadium: Highbury FC vs Venda FC 15h00.
E-Athlone: Cape Town Spurs vs University of Pretoria 15h00.
NGOMGQIBELO
ESolomon Mahlangu: Casric Stars vs Black Leopards 15h00.
EMxolisi Dicky: Upington City vs Milford FC 15h00.
E-Olympia Park: Orbit College vs Baroka FC 15h00.
EDobsonville: Pretoria Callies vs Hungry Lions 15h00.
KaNyamazane: Kruger United vs Leruma FC 15h00
NGESONTO
ESoshanguve: JDR Stars vs Durban City 15h00.