Ulubalubela ukubuyela kwiBafana ezodlala kwi-Afcon

NGU-DARREN Keet ongunozinti weDurban City.

ISITHOMBE NGABE: BACKPAGEPIX

Mfanafuthi Ndlovu

ULUBALUBELA ukubuyela esikwatini seBafana Bafana esizodlala kwi-Africa Cup of Nations (Afcon) ezokuba ngoDecember nangoJanuary eMorocco uDarren Keet ongunozinti weDurban City, efike ngelikhulu ishodi kwiBetway Premiership.

UKeet usefomini enhle kulezi zinsuku njengoba engakangenelwa yigoli emidlalweni emibili esagijinywe ngezakhe kulesi sigaba esikhulu abangomakoti kusona.

Lo nozinti wake waba yingxenye yeBafana phambilini, okwenza alangazelele ukubuyela kulesi sikwati esilolongwa nguHugo Broos waseBelgium.

UKeet ekhuluma nabezindaba ngemuva kokuba ezakhe zehlule iChippa United ngo-1-0 koweligi ngoLwesithathu ebusuku eChatsworth Stadium, eThekwini, uzwakalise ukujabula ngokunikwa ithuba nguGavin Hunt ongumqeqeshi wale kilabhu.

Echaza ngokusayina kwakhe kwiCity, uthi wafonelwa nguFarook Kadodia ongumnikazi wale kilabhu, wamdayisela izifiso zakhe, okwenza waqoma kalula kwazise wayesevele esesifakile isicelo sokwehlukanisa neCape Town City eseyidlala kwiMotsepe Foundation Championship (MFC), emuva kokudliwa yizembe.

Lo nozinti uthi indlela asedlala ngayo kwiCity, ukholwa wukuthi ingamunika ithuba lokubuyela kwiBafana, okuyiphupho lakhe elikhulu.

"Ngingajabula uma ngingaphinda ngibizelwe kwiBafana. Nokho okubalulekile wukudlala kahle ekilabhini, ngithokozise abalandeli bekilabhu ukuze ngigcine neso labaqeqeshi beBafana lingibhekile.

"Kufanele ngisebenze kanzima ukujabulisa uBroos uma esenza amalungiselelo akhe e-Afcon," esho.