NGABADLALI beDurban City bejabula emuva komdlalo wabo wokugcina kwiMotsepe Foundation Championship, abaguqise kuwona iCape Town Spurs ngo-1-0.

ISITHOMBE NGABE: BACKPAGEPIX

Mfanafuthi Ndlovu

LIGADLA liphindelela izembe kwiDurban City elungiselela ukuqala isizini ka-2025/26 ngegiya eliphezulu ukuzinza kwiBetway Premiership engomakoti kuyona.

ILANGA Lempelasonto lithole ukuthi izikhulu zeCity zifake amasondo inqwaba yabadlali okubalwa kubona uXolani Slawula, uLuvuyo Phewa, uMbuso Mdakane, uDumsani Msibi, uS'phamandla Nzuza, uSanele Gaxa, uBongumusa Nkosi, uVictor Bakah, uMphakamiseni Nene noSiyabonga Ndlovu.

Bonke laba badlali bebeyingxenye yesikwati sikaSimo "Govuza" Dladla, obengumqeqeshi, esinyusele le kilabhu kulesi sigaba esikhulu isuka kwiMotsepe Foundation Championship.

NoSimo akasekho kwiCity njengoba eseyisekela lika-Arthur Zwane ongumqeqeshi wamaZulu FC okufakazisa isisho esithi umbeki wenkosi akabusi nayo.

NGUMPHAKAMISENI Nene ongomunye wabadlali okuvela ukuthi bachithwe yiCity.

ISITHOMBE NGABE: BACKPAGEPIX

ICity izokuba nomdlalo wobungani neRichards Bay FC ngoLwesihlanu ukulungiselela imidlalo yeKZN Premier's Cup ezokuba ngempelasonto yokugcina kaJuly, eMhlathuze.

Abaphathi beCity bamatasa bazama ukuthola abadlali abasha abazokwazi ukuvala izikhala zalabo abahambile.

UFarook Kadodia ongumnikazi weCity, ekhuluma naleli phephandaba, uthe bamatasa bazama ukuthola abadlali abazokwazi ukubeka le kilabhu ezingeni eliphezulu.