Mfanafuthi Ndlovu

UYIBONA izothwala kanzima iMamelodi Sundowns ukuvikela isicoco seligi kule sizini uGavin Hunt ongumqeqeshi weDurban City eqhwakele kwi-log yeBetway Premiership, yize ingomakoti kulesi sigaba.

UHunt ukusho lokhu emuva kokuba ezakhe ziqumbe phansi iChippa United ngo-1-0 wegoli likaJoslin Kamatuka, elingene seliyozilahla kunina kulo mdlalo obungoLwesithathu ebusuku eChatsworth Stadium, eThekwini.

 Lokhu kwenze le kilabhu yaqhwakela ngamaphuzu awu-6 emidlalweni emibili, kwazise kowokuvula isizini ihlule iTS Galaxy ngo-2-0 eMpumalanga.

Lo mqeqeshi uyazethemba ezakhe njengoba enomlando wokunqoba iligi amahlandla amathathu elandelana neSuperSport United, wabuye wayiqukula kanye neBidvest Wits - okungamakilabhu asewumlando kunobhutshuzwayo waseNingizimu Afrika.

NGABADLALI beDowns bejabulela ukunqoba iBetway Premiership.

ISITHOMBE NGABE: BACKPAGEPIX

UHunt uthi ukucinana kwemidlalo ezogijinywa yiSundowns kule sizini, kuzokwenza ukuba idonse kanzima ukuthola imiphumela emihle nakwiligi njengoba yona ifana ne-marathon.

Uthi maningi amakilabhu afuna ukuyigudluza iDowns embusweni wayo wokunqoba iligi amahlandla awu-8 iminyaka ilandelana.

Uqhuba ngokuthi njengoba ibidlala nakwiFifa Club World Cup nje ebiseMelika, abadlali bayo bayabonakala ukuthi kabakutholanga kahle ukuphumula.

Uthi nokuba khona kwe-Africa Cup of Nations (Afcon) ezogijinywa ngoDecember nangoJanuary eMorocco, kuzokuba nomthelela ongemuhle kwiDowns njengoba abadlali bayo abaningi bezokuba yingxenye yalo mqhudelwano.

Uzwakalise eyobumqoka bokuthi bona baqhubeke nokuqoqa amaphuzu kusakhanya, ukugwema amathonsi abanzi uma sekuzophela isizini njengoba izinto zisuke sezishubile.
"Kubaluleke kakhulu ukuba siqhubeke nokucosha amaphuzu agcwele emidlalweni esinayo ukuze singazitholi sesisenkingeni ngokusongwa kwesizini, njengoba silwela ukugcina ikilabhu igijima kulesi sigaba nangesizini ezayo njengoba sibasha kusona.

"Kumnandi ukuba nemidlalo eminingi esondelene, ikakhulukazi uma unqoba, ngoba umgqigqo kawulahleki," esho.

Le kilabhu izokuba nomdlalo onzima ngoLwesibili ngo-19h30 eChatsworth Stadium njengoba iqhathwe nomkhaya bayo iLamontville Golden Arrows ecoshe amaphuzu agcwele iguqisa iRichards Bay ngo-1-0 ngoLwesithathu ebusuku eMlazi.