NGUBONGOKUHLE Hlongwane okhombisa ukubuyelwa yifomu e-USA.

UYAQHUBEKA nokufaka ingcindezi kuHugo Broos ongumqeqeshi weqembu lesizwe laseNingizimu Afrika, iBafana Bafana uBongokuhle Hlongwane osematheni kulezi zinsuku emuva kokuqhulula amagoli kwiMinnesota United yase-United States of America (USA).

Emasontweni amabili elandelana, lo mdlali ukhombisa ukubuyelwa yifomu phambilini eyake yamfaka kwiBafana.

Emuva kokwehlelwa yifomu, uBroos wavele wamshiya ngisho eqenjini elabuya nendondo yethusi kwi-Africa Cup of Nations (Afcon) ebise-Ivory Coast ngasekuqaleni kuka-2024.
Ngesizini edlule, lo mdlali ushaye amagoli awu-7 njengoba esekhombisa ukubuyelwa yifomu ekilabhini yakhe.

NGUHLONGWANE ejabulela elinye lamagoli akhe kwiMinnesota yase-USA.

Njengoba iBafana ibheke emidlalweni ye-Afcon ezokuba ngoDecember nangoJanuary eMorocco, lo mdlali odabuka eMgungundlovu, kubukeka engaba wusizo kakhulu kwelakuleli kwazise livele lintula abagadli abangalibheki ipali.

Elakuleli lagcina ngoBenni McCarthy ukuba nomgadli ovuthayo, naye owafika elandela uShaun Bartlett, uSiyabonga Nomvete noPhilemon "Chippa" Masinga ongasekho - ukukha nje phezulu.

Khonamanjalo, iyaqala imidlalo yeChampionship yase-England kule mpelasonto kanti ihlelwe kanje:-
NGOLWESIHLANU
Birmingham vs Ipswich 21h00.
NGOMGQIBELO
Southampton vs Wrexham 13h30.
Coventry vs Hull City 13h30.
Charlton vs Watford 13h30.
West Bromwich vs Blackburn 16h00.
Norwich City vs Millwall 16h00.
Oxford vs Portsmouth 16h00.
Stoke City vs Derby County 16h00.
QPR vs Preston 16h00.
Sheffield United vs Bristol City 18h30.
NGESONTO
Leicester City vs Sheffield Wednesday 16h00.