UHunt uhehwe wumlando onothile weDurban City

Uthi le kilabhu beyivutha bhe esengumdlali ngama-70's nangama-80's

NGUMQEQESHI weDurban City uGavin Hunt.

Senzo Sokhela

UHEHWE wumlando onothile weDurban City uGavin Hunt ongumqeqeshi omusha wale kilabhu engomakoti kwiBetway Premiership.

ICity inyukele esigabeni esiphakeme emuva kokudla ubhedu kwiMotsepe Foundation Championship (MFC) ngaphansi kobuholi bukaSimo "Govuza" Dladla obengumqeqeshi. Kuthiwa izingxoxo zokuba uDladla aqhubeke nokusebenza kule kilabhu kazihambanga kahle, kwabe sekwehlukwana.

NGUMQEQESHI weDurban City (kwesokudla) uGavin Hunt no-Ernst Middendorp ongusomaqhinga wale kilabhu.

ICity ibe isiqasha uHunt njengomqeqeshi wayo omusha. Ilande no-Ernst Middendorp njengosomaqhinga.

UHunt ephawula ngokuqoma le kilabhu yaseThekwini, uthe: "Ngisengumdlali ngibhekane nayo iminyaka. Uma singazuza okungenani isigamu salokhu okuzuzwe yiDurban City yakudala, siyobe sisebenzile.

"Ngeminyaka yo-1970 no-1980 iDurban City bekuyisikhungo esikhulu, inabalandeli abaningi abangamaNdiya. Uma singabuyisa leyo nto eChatsworth njalo ngoLwesihlanu ebusuku, okuyinto ebivamise ukwenzeka ngoLwesihlanu eKingsmead, mhlawumbe neMainstay ingaqala ithengwe kakhulu njengaleziya zinsuku," kusho uHunt.

YINKUNDLA iChatsworth Stadium eyikhaya leDurban City.

Le kilabhu iqanjwe kabusha ngeleDurban City ngesizini edlule ngemuva kokufudukela eThekwini njengoba phambilini beyaziwa ngeMaritzburg United futhi izinze eMgungundlovu.

Ukugencwa kwayo yizembe kwenza umasipala waseMsunduzi wanqamula ubudlelwano nayo. Lokhu kwaholela ekutheni intule inkundla yasekhaya njengoba ibisebenzisa ezaseThekwini, yagcina seyifudukele khona unomphela.