YINGONYAMA uMakhosetive "Mswati III" Dlamini, nomholi webandla lamaNazaretha, ohlangothi lwaseBuhleni iNkosi uMduduzi "Nyazilwezulu" Shembe.

Phumlani Gama

IZOBANJELWA esigodlweni esiyikomkhulu lezwe laSwazini inkonzo eyandulela usuku lokuvalwa komhlangano wamaNazaretha, ohlangothi lwaseBuhleni.

Inkonzo izobanjelwa esigodlweni eLudzidzini Royal Palace, phakathi kwedolobha iManzini nenhloko-dolobha iMbabane.

Umholi waleli bandla iNkosi uMduduzi "Nyazilwezulu" Shembe nezinkumbi zamalungu aleli bandla, babambe umhlangano wamasonto amathathu kuleliya lizwe.

UNyazi luqale ngo-2023 ukuhambela izwe lakwaNgwane, ngenhloso yokuhlangana namalungu ebandla akhona. Ngawo lowo nyaka, iNgonyama uMakhosetive 'Mswati II' Dlamini imemezele ukuthi ubukhosi bayo bunikela ngomhlaba wokwakhiwa komuzi waseBuhleni. Lo muzi wakhiwe kwaManzini.

Ukwakhiwa kwawo lo muzi kwenze ukuthi ibandla lamaNazaretha liqhubeke nokukhula kuleliya lizwe.
NgoMgqibelo kuzobanjwa inkonzo yesabatha enkundleni yezemidlalo engaphakathi esigodlweni eLudzidzini.

Enkonzweni yeSabatha kulindeleke ukuba kube nezihambeli zemikhakha eyehlukene, okubalwa kuzona neziphuma kuleli laseNingizimu-Afrika. Ngosuku olulandelayo uNyazi luzobusisa imigidi.

YINKOSI uMduduzi "Nyazilwezulu" Shembe.

Leli phephandaba lithole ukuthi iNgonyama uMswati III, izobe iyingxenye yezicukuthwane ezizobe zibuka kusina imigidi yaleli bandla. Ilungu lebandla eliseSwazini, litshele ILANGA Lempelasonto ukuthi lena ithathwa njengempelasonto enkulu kuleliya lizwe.

"Siyathandwa isixaxa salaba baholi. Ukuhlangana kwabo kuyinto enkulu kubalandeli babo. Thina sizizwa sithobeke kakhulu ngendlela esemukelwa ngayo lapha eSwazini.

"Nakuba ikhona ingxenye yabantu abambalwa abenza okungalungile, kodwa iningi labantu linenhlonipho. Likubeka phambili ukuphatheka kahle kwethu esisuka eNingizimu Afrika. Uma eqeda ukubusisa imigidi ubaba (uNyazi) uzobe eselifulathela elaseSwazilani, ebuyela eNanda," kuphetha umthombo.