NGUMQEQESHI Sundowns Reserves, uTiro Van Rooyen enozakwabo, uMichael Manzini.

ISITHOMBE NGABE: BACKPAGEPIX

Mfanafuthi Ndlovu

USEYABUQONDA ubunzima bokuqeqesha esigabeni seDStv Diski Challenge (DDC) umqeqeshi weMamelodi Sundowns Reserves ezovovana inkani neTS Galaxy Reserves ngeSonto ngo-10h00 eLucas Moripe Stadium, ePretoria.

ISundowns Reserves ihleli endaweni yesibili kwi-log ngamaphuzu awu-39 emidlalweni ewu-19, kanti kuqhwakele i-Orlando Pirates ngawu-44 emidlalweni ewu-18.

UTiro Van Rooyen oqeqesha iSundowns Reserves, uthi useya ngokusijwayela lesi sigaba kwazise usafika kusona, emuva kokushiya kukaSinethemba Badela owanyukela kwiBetway Premiership.

UBadela wajoyina iChippa United ngasekuqaleni kwesizini, kodwa wangahlala isikhathi esitheni, yamchitha kanti muva nje uxoshwe yiDurban City, kwabamba uPitso Dladla.

NGUTHATO Sibiya ogijima kwiSundowns Reserves oseke wagijima imidlalo embalwa esikiminie sikhulu sale kilabhu.

ISITHOMBE NGABE: BACKPAGEPIX

Ukubuyela odabeni lukaVan Rooyen, uthe ujatshuliswa wukuthi ucija isikwati esibunjwe ngabadlali abanekhono elibabazekayo.

"Sicija abadlali bethu ukusebenza ngendlela eyodwa emidlalweni ukugcina isitayela sekilabhu sifana, ukusuka phezulu kuya phansi.

"Siyazi ukuthi kalula ukufaka isitayela esisodwa, kodwa sisizwa nawukuba khona kwabadlali abafana noSiyabonga Mabena, uGomolemo Kekana noThato Sibiya asebenesikhashana beyibambe kulesi sigaba.

"Ekuhambeni kwesikhathi sizobuyela emgqigqweni wokwenza kahle kuyo yonke imidlalo. Ngilibona liqhakazile ikusasa kulesi sikwati esinaso," esho.

Isiyonke imidlalo yeDDC engempelasonto imi kanje:-
NGOMGQIBELO
EGelvandale: Chippa United Reserves vs Siwelele FC Reserves 10h00.
EChatsworth Stadium: Durban City Reserves vs Sekhukhune United Reserves 10h00.
EDobsonville: Kaizer Chiefs Reserves vs Richards Bay Reserves 10h00.
E-UJ Soweto: Orlando Pirates Reserves vs Polokwane City Reserves 12h00.
ELucas Moripe: Mamelodi Sundowns Reserves vs TS Galaxy Reserves 10h00.
NGESONTO
E-CUT Stadium: Marumo Gallants Reserves vs Lamontville Golden Arrows 10h00.
E-Olympia Park: Orbit College Reserves vs Stellenbosch Reserves 10h00.
ESugar Ray Xulu: AmaZulu FC Reserves vs Magesi Reserves 11h00.